ننشر أسباب منع حلقة سارة نخلة في برنامج "نفسنة" من العرض

عبرت الفنانة السورية سارة نخلة عن استيائها الشديد من عدم عرض حلقتها ببرنامج "نفسنة" حتى الآن، والتي حلت عليه ضيفة وقت حدوث اأزمة الشهيرة بين أحد مذيعاته، حبيبة، وزميلتها الفنانة انتصار، والتي أدت وقتها لترك حبيبة البرنامج.
وذكرت نخلة أن السبب وراء منع حلقتها هو حجة واهية وهي ظهور الحلقة بشكل غير لائق من وجهة نظر مخرج البرنامج، وذلك إصابة مذيعات البرنامج بحالة من التوتر ظهر خلال الحلقة.
وأضافت أن السبب الرئيسي هو مدحها لحبيبة خلال تصوير الحلقة.
ونشرت نخلة، عبر صفحتها الشخصية على موقع التواصل الاجتماعي، فيس بوك، رسالة غاضبة للقائمين على البرنامج وللجمهور وكشفت من خلالها حقيقة ما حدث، قائلة: "هل تعلم #برنامج_نفسنة من شهرين تقريبا استضافوني في برنامج نفسنة.. وصلت الاستديو وبعد انتظار أكثر من 5 ساعات عملت مكياج وشعر وبقيت جاهزة وأنا كل شوية أسأل هو في ايه يا جماعة وبعدين يا جدعان وأنا عايزة امشي بس عيب جدا عشان زميلتي العزيزة هيدي كرم هي الّي اقترحت استضافتي بعد لقائنا في تصوير مسلسل "هبة رجل الغراب".. مشكورة طبعا.. وعشان أنا كنت متحمسة للحقلة عشان فاكراها حلقة ضحك وهزار وفرفشة المهم بقا بعد كل الانتظار دا بسمع صوت ردح وزعيق وصريخ وكلام فظيع غريب مش هكتبه عشان عيب اوي المهم يا اساتذة طلعت الأستاذة بدرية والأستاذة انتصار مع كل احترامي ليهم طبعا وأنا مفيش بيني وبينهم إلا كل خير وحب ومودة بيتخانقو مع حبيبة والي فهمته ان حبيبة سابت البرنامج ومشيت فبالتالي اتاخرو عشان يفهمو هيعملو ايه".
وأضافت في رسالتها: "طلعت صورت وكانوا لطاف جدا انتصار وبدرية وهيدي حقيقي كانت حلقة لطيفة جدا.. وعدا شهرين وأنا بسال ايمتا حلقتي هتطلع والإنتاج يقولي كمان شوية وكمان شوية وكمان شويتين المهم بقا من خمس ايام عرفت من الإنتاج أن الحلقة مش هتتعرض وأنا قولت أستنا خمس ايام قبل ما التسرع واكتب البوست... خير انشالله.. قالك ولله المذيعات طالعين مش حلوين نعم يا فندم هو مفيش مونيتور هو مفيش مخرج كان قاعد بيشوف هو مفيش ناس متابعه هو مفيش مكياج هو ايه بالظبط.... قالك ولله المذيعات كانوا متوترات بسبب الي حصل قبل الحلقة.. ومعليش يا استاذة احنا هنعيد الحلقة... نعم... يعني مطلوب مني ارجع امثل واعيد الي عملته عشان المذيعات كانوا متوترات.. السؤال هنا... هو المخرج دا بيكون موجود في الحلقات كلها وبيشوف النفسنة والردح والكلام الغريب وما شافش ان المذيعات كانوا متوترات بصراحة شابو على برنامج التمثيل النفسناوي البحت... السؤال هنا هل سبب عدم العرض هو اني قولت في الحلقة اني بحب حبيبة الكيوت اللذيذة المحترمة أو لأني كنت عفوية وطبيعية جدا وهم متعودين على التمثيل".
وتابعت نخلة: "معلومة لا تعرفوها عن برنامج نفسنة بقا اهي حصلت وحصلت بقا... بيعرضو الي هم عايزينو والباقي بيروح بالمونتاج وش... وحواري دا اتكرر مع اكثر من فنان منهم محمد سليمان والخناق حصل بوجوده والفنان عمرو عبد العزيز
لازم اتشكر معدة البرنامج حنان حسين عشان تعبت معايا وتابعت معايا وكانت متحمسة زيي أشكرك... اشكر هبة مجدي على المكياج وبشكر غادة حشاش على الفستان ودا واجب عليا عشان الناس دي تعبت وتعبها ماتقدرش وطلع... #احترموا_الناس عشان نحترمكم".