يوسف حسن يهاجم إدارة الزمالك: هيخلوني أبطل كورة

شن يوسف حسن، مهاجم الزمالك، هجومًا ناريًا على إدارة القلعة البيضاء؛ بسبب الوضع الذي يعيشه اللاعب داخل ناديه خلال الفترة الأخيرة.
وجاء بيان لاعب الزمالك كالتالي..
«أنا هتكلم بس مش عايز جمهور الزمالك يزعل مني في أي حاجة.. أنا بسبب اللي بيحصل معايا ده هبطل كورة بالشكل ده انا لا بتأهل ولا بتدرب ومستقبلي بيضيع.
أنا الكورة هي شغلي وأكل عيشي ومش عارف أنا أذنبت في ايه ولا عملت ايه علشان اللي بيحصل معايا ده.
عمر ما حد شاف مني حاجة وحشة ولا شاف إني بعمل مشاكل أنا ديما فحالي.. بس اللي حصل فيا مش قليل عارف الناس ممكن متصدقش اللي بيحصل معايا بس وحياة الأيام المفترجة دي
أكيد أنتو عارفين على موضوع العملية وكده ومحدش كان راضي يعملها من الإدارة.
وعملتها بعد مجهود كبير جدًا جدًا بعد 6 شهور قاعد في البيت.. وبتحصل معايا نفس الحاجة بعد ما الإدارة الجديدة وعدوني هنوديك علاج طبيعي أنت لعيب مهم وانت وانت وانت..
أول شهر ودوني ل دكتور علاج طبيعي اسمه د. خالد الشناوي.. رحت شهر واتنين والنادي مدفعش الفلوس ل الدكتور العلاج الطبيعي وكل شوية هو يقولي ويطلب فلوسه..
طبعا أنا اتكسفت إني أروح تاني العلاج الطبيعي.. أنا بقالي 3 شهور يعتبر قاعد ف البيت، وحياة ربنا وحياة ربنا ما حد عبرني ب مكالمة تليفون ولا حد بيرد عليا أصلا.. حسبنا الله ونعم الوكيل في كل ظالم.
أول مرة أشوف كده.. أول مره أشوف ظلم ب عيني فعلا.. عمري ما حصل لي كده ف حياتي.
كل ما أروح لحد يقولي اتكلم مع الإدارة.. أتكلم يقولولي مش عارف أي مفيش حد وقف معايا نهائي بس غلطتي إني مكنتش بطلع أتكلم.
أنت جيبني بفلوس مش فلوس قليلة مفروض تقدرني مفروض لاعيب منتخب مصر.. ليه بيحصل معايا أنا في نادي كبير واسم كبير.
وجمهور الزمالك عارف أنا بحبهم ازاي بس أنا اتظلمت كتير وغلطتي إني كنت ساكت مش عايز اتكلم بفكر ف مصلحتي.
لما لقيت الناس كلها بتهاجمني أنا ومفكرني أنا اللي قاعد ف البيت بمزاجي.
محدش يزعل مني أي حد زعلته حقه فوق دماغي أنا بحب جمهور الزمالك».