محامى سيدة بورسعيد المجني عليها: نورهان شخصية حدية وتعانى من اضطراب سلوكى

أكد محمد صفا، محامى المجنى عليها داليا الحوشى التى قتلت على يد ابنتها بمساعدة جارها العشيق، أن القانون المصرى لا يوجد به حق الدية، ولاحق الدم، وممثل المجتمع المصرى كله هو النيابة العامة والقضية التى نتحدث عنها ليست قضية مباشرة أو قضية قتل عادية، ولا قتل عمد فقط، بل قتل عمد مع سبق الإصرار والترصد، ومع سرقة وحيازة سلاح، وموضوع إن المدعى بالحق المدنى يتنازل هو أمر قراره لعدالة المحكمة.
نورهان وجارها
الابتزاز فى صورتين
وأضاف 'صفا' محامي المجني عليه: 'قيل إن أوراق القضية 625ورقة، واغتصاب منزلى، و3 روايات للمتهمين'، معلقا: 'اللى معاه الكلام ده يطلعه'
وتابع محامي المجني عليها: 'أنا متعاطف مع الأب، وهو فى كرب عظيم، وابتلاء عظيم، لكن هناك شخص لا يجوز أن نتنازل عن حقه وهو الأم، فالابتزاز الذى تحدثوا عنه عبارة عن 'صورتين' صورة المجرم وكلبه، والمجرم ونورهان وهما فى المسلة صورة سلفى وبيضحكوا فهذا تسفيه، وليس ابتزاز، فالأوراق تحكى كل شىء فى العلاقة التى كانت بينهما'.
وأكمل: 'عاوز تنكر أنت حر، لكن لا تنقص من حق المرحومة، هى عارفة إنها قاتلة أمها وحرضت، وسهلت كل حاجة، فهل سخنت المياه للقهوة فى 'حله' من غير يدين! وعندما نزلت وتركت المتهم فى منزلهم لماذا لم تصرخ وتقول 'الحقونى قتل أمى'.
نورهان شخصية حدية
وأردف محامي سيدة بورسعيد المقتولة على يد ابنتها: 'شخصية نورهان 'حدية' مزاجية استعنت منذ بداية القضية ب2 أطباء نفسيين، وأخصائى نفسى، حتى يقوموا بتشخيص حالة الفتاة، لأننا صوعقنا، وتعبنا نفسيا عندما قرأنا القضية وتبين أنها تعانى من اضطراب سلوكى اختلال سلوك، لكنه لا يؤثر على قواها العقلية فهى لا تتخذ قرار قبل استيعابه وهناك 9 سمات لاضطراب السلوك ونورهان تحصل على 7 من 9 فى هذا التشخيص 'الحدية'.
شقيق نورهان: أختى بريئة
من جانبه، قال أحمد خليل، شقيق نورهان الفتاة المتهمة بقتل والدتها ببورسعيد بمساعدة جارها العشيق، خلال مكالمة صوتية أرسلها ل 'أهل مصر': 'كفاية أمى ماتت، أختى بريئة والله العظيم، وأنا مش مستعد أخسرها، أنا شوفتها كذا مرة، هى ممكن تكون هناك بتكفر عن أى ذنب هى عملته، لكن مش موت أمها'.
وأضاف شقيق نورهان: 'هى قالت لي والله ما كنت أعرف إن كل ده كان ها يحصل، وأنا ما شوفتش حاجة فى ايده، هى خوفها عليه اللى وصلها لكده، وقالت لى 'أحمد أنت كنت ملاحظ أنا بحبك قد إيه وغلاوتك عندى قد إيه، حتى ماما كانت بتقول لها: وفقى بين إخواتك وما تحسسيش آدم بالفرق أنت بتحبى أحمد أكتر، لكن كانت بتعامل آدم كأنه ابنها قبل ما يكون أخوها.
وتابع شقيق نورهان: 'هى قالت لى انت كنت كل حاجة، وأغلى حاجه لى، وما زلت لانى ما قدرتش افتح لك الباب بسبب خوفى عليك انك تتأذى، بس أنا هنا علشان فتحت الباب بحسن نيه لحسين، انا خوفت عليك انك تتأذى ويعملولك عمل زى ما عملولى وإنى خوفت اتكلم، لو حد غيرك كنت فتحت والله واللى يحصل يحصل'.
وأكمل: 'انا كانت عاوز اطلع اتكلم مش علشان حابب انى اتشتم، كنت حابب اتكلم على اختى اللى احنا عشنا معاها، وعرفناها إن عمرها ما تعمل كده، نفسى الناس تحس بى، حد يجى حط نفسه مكاني أنا خسرت أمى، ومش مستعد اخسر اختى كمان، اختى لو مش مظلومة اقسم بالله ما كنت اتكلمت ولا دافعت عنها، بس ربنا وحده يعلم احنا كعيلة كنا متماسكين ازاى والناس عرفانا، اسألوهم عننا'.
واستطرد شقيق المتهمة بقتل والدتها: 'كل اللى انا طالبه بستسمح حضرة القاضى ان الحكم يتخفف، وينطق أى حكم، بس بلاش حكم الإعدام، كفاية خسرت واحدة، كفاية خسرت أمى مش مستعد أخسر اختى كمان'.
ده كل اللى عاوز أوصله، وطالب الناس ترحمنا، احنا مش مستحملين، ربنا ما يكتبها على حد، أنا طالب الناس تترحم على أمى لأن فراقها صعب قوى علينا وعلى أخويا اللى لسه سنه صغير، علشان كده مش هنقدر نستحمل فراق أختى كمان لأنها كانت كل حاجة فى حياتنا، باعتبارها أمى التانية، صدقونى الفراق صعب قوى ربنا ما يجربه على حد'.
وأردف: 'طلب أخير من الناس، حسوا بنا بلاش كلام مؤذى، وصعب قوى، ربنا ما يجربه على حد، أنا آسف إذا كنت طولت عليكم بالكلام وبشكركم أنكم سمعتونى وبستسمحكم إنكم ترحمونا شوية وكفاية كلام، أنت يا اللى بتتكلم حط نفسك مكاني، بس ده كل اللى طالبه'.
واختتم شقيق نورهان: 'مفيش حد فينا ما بيغلطش ربنا غفور رحيم كفاية خسرت أمى، مش مستعد أخسر أختى كمان، أى حد يحط نفسه مكانى فجأة لقيت نفسى خسرت أمى وهاخسر أختى، إحساس صعب جدا، مش هاقدر أعيش من غيرها، كفاية أمى راحت، وما فيش حد فينا ما بيغلطش، الدكتور بيغلط والعالم بيغلط وربنا غفور رحيم فى الآخر، ما بعترضش والله على الحكم ولا على أى حاجة بس أى حكم غير الإعدام، إحنا مش هنقدر نعيش من غيرها حتى لو هاشوفها كل فين وفين بس علشان أخوها الصغير'.