قصائد

اتجاهات ليله الوقفه
لو باصرها
من قاصرها
الزواق ما هوش
مصيرها
لسه حالك هو حالك
واللي نالك بيحاصرها
مره واحد مره تاني
كله شغل الامريكاني
وانت لو رافض تعاني
انتبه وانت ناصيرها
لو باصرها
من قاصرها
ابتدي من جوه بيرها
خيرها لسه فيه وياما
لسه فيه مفروده قامه
لسه فيه ابن البلد
بس تالفه الاستقامه
والسكوت لاجل السلامه
والمتاهه ودين اوباما
....
انما هوه فتوه
لسه جوه فيه مروه
فيه ابو زيد العنيد
فيه سمار ابن الصعيد
لسه جواه الجدع
الي رافض يتخدع
بس نفسه في الجديد
المصطبه
المشترك
نط وترك
اسلاكه جنب الأجهزه
و الضلمه ظالمه
وفي انتظار المعجزه
بره بيوت الكهربا
حلوه وجميله المصطبه
والشمعه جامعه
كل حاجه مغربه
الشمعه نسمه
بريحه النيل والصعيد
الشمعه فتحت كل
ابواب الامل
الشمعه رسمت
يوم جديد
مش مستفيد
الا بشمس السما
وبحب حجر البراح
لو الحياه محكمه
كانت هتحكم بالحياه
لكل كل المخلوقات
كانت هتحكم
بالفلسفه
علي كل معني اختفي
جوه بيوت الكهربا
شيطانه الشعر
الملفت في التشابيك
شبابيك الضي
لما بتنور في عيونك فجأه
وبتبقي مفاجأه
وكأنك ولأول مره بتصحي
علي بنت جميله وناصحه
بتحاول تخطف قلبك
من أول حاله فهم
وبيجرح قلبك هذا السهم
هذا العشق المولود
من حجر الايام
بتقرب منها وتقرب منك
وكأنك مش محتاج لكلام
ولأنك متعود عالكتمه
فكلام قلبك
بيشكل في الورقه
قصيده