ماتش في المدرجات

بين جورج سعد وطلبة صقر كبيري مشجعي الزمالك والأهلي
جورج. زمالك
هاتوا الدفاتر تنقري
عشان تشوفوا اللي جري
والأهلي "خيبته" مسجلة
وحاجة آخر مسخرة
م الكاس قوامك صيفوه
والدوري منه ضيعوه
ومشجعينه خلاص فاتوه
وكل يوم بيجيب ورا
هاتوا الدفاتر تنقري
طلبة. أهلي
مال العتاولة مصهللين
وفي العناتلة شمتانين
دا ماكانش دوري من سنين
خدتوه أوانطة وهنكرة
جمهورنا مافقدش الأمل
ولا بيقعش إلا الجمل
والأهلي لو صفه اكتمل
حيخليها لكم مجزرة
ونجيب دفاتر تنقرا
جورج
جبتوا المدرب م المجر
وحيعمل ايه شيخ الغفر
في مخ أنشف م الحجر
ماتلمعوش السنفرة
فرقتكوا لازم كلها
من جونها لما لونجها
في شوال وقفة نحطها
وتغرقوها ف دندرة
ونجيب دفاتر تنقرا
طلبة
إعمل موازنة بهمتك
بين فرقتي وبين فرقتك
وأنا برضه راضي ذمتك
لو حتي هي مزورة
هات الدفاتر تنقرا
جورج
الروبي مصفة مفوتة
واقف عشان الكروتة
وجوان تفوت زي الشتا
وكأنه باب المندرة
طلبة
مش برضه احسن من يكن
ملك الملوك اللي اتركن
ولا عدش ينفع لا ف سكن
ولا حتي فرقة كعبره
جورج
جير مانو سهل ترقصه
من مشوارين تفقطه
ولعبتين يخلصوا
ولافيش لزوم للمشورة
طلبة
يعني شاهين فتك قوي
ولا بسلامته فهلوي
دانا لو أشوط من ملوي
تدخل شبكته مقشره
جورج
طارق سليم لو اتوزن
يكفي أورطه في اليمين
ولو يشوف محمود حسن
تطلع له عضله مكعبره
طلبة
ماعندك أحمد مصطفي
أبو رجل زي المغرفة
شارع وناقص نرصفه
أو حتي سميه قنطره
جورج
وأبو غيدا إيه رأيك بقي
ضليع في فن البعزقة
واقف عشان التريقة
والترقيصات والبعترة
طلبة
وأبو الرجال الزنبقة
ملك ملوك الزحلقة
لو شاف"مطر" في الغردقة
يهرب يروح انجلترا
جورج
طب والمهندس ياطلب
راجل بيلعب بالطلب
ولو غلب ولا انغلب
هي الفوزيته مقدره
طلبة
رأفت بتاعكو اللي عدل
دا بأي لاعب يتبدل
وإذا اتعوج ما بيتعدل
في رقبته"شوكة" محجرة
طلبة
جايبين مصارع م الغابات
وموقفينه في الهافات
لو رقصوه يوم التلات
يقوم في جمعة وياتري
جورج
عوضين ياطلبة وقصته
الله يساعده في بلوته
ايه بس فايدة جريته
مدام بيطلع من ورا!
طلبة
اسم الله ع النور الجميل
شبيه جارينشا البرازيل
يفضل يبرطع ع النجيل
لما النجيل داب واتهري
جورج
طب وبسلامة المغربي
زي الحصان الأجنبي
جايبينه ليه دا والنبي
مثلا خيولكوا مقصره!
طلبة
وأبو رجل حساسة الفتك
من أي حاجة بيتربك
ويبقي قدام الشبك
ويشوط في برج القاهرة
جورج
حسب الله ريس تختكم
بتعبدوه من كفركم
مع انه لو بيحبكم
لازم يسيب المسطره
طلبة
والبلوة ده ما هي عندكم
بلبل مسبب غلبكم
من طول دلعكوا وحبكم
سايق عليكوا الغندرة
جورج
ورأيك ايه في المشيخة
صبحت شوطاته مدروخة
حالته بصراحة ملبخة
أحسن له يمسك مبخرة
طلبة
أهو حالته أحسن من علي
الفرود السبهللي
لو ماتش واحد ينجلي
يلعب سنة زي ال...؟
جورج
وريعو طب ليه اتركن
مش قلتوا دا عفريت يكن
ماتركبوا في رجليه مكن
بدل مايمشي جرجره
طلبة
عفت بتاعكوا بذمتي
مايلعبوه في حتتي
وان كنت عايز فكرتي
يسرح في قطر المعصرة
جورج
ياطلبة بطل هلوسة
نادي الزمالك مدرسة
هي الحكاية فلحسة
والا الهزيمة مأثرة
طلبة
لو اتغلبنا منكوا
يبقي الكلام من حقكوا
وبكره تلقوا وعدكوا
من الفانلة الأحمرا
ونجيب دفاتر تنقرا.