قصائد قصيرة

1
لو غرسنا البذرة في الأرض
هاتطرح لنا أحلام
بطعم العسل في الحليب ..
لو حطيناها في الهوا
مش هاتطرح لنا البذرة
غير الأكاذيب !!
2
لوأنت إبليس
وماشي في الحياة تفتكس ..
أنا مصري ومبدئي
أن الجرح الخبيث
له الدوا النجس !!
3
كهنة ووقفوا علي منصة
وبقر اتلموا علي إشارة
ومدرس بيعاكس في الحصة
وجامع أصبح خمارة
وأنا ماسك علم بجنيه
ووحدي باصد بيه ف الغارة
4
بتلوي دراعي
يا الفوضي
يا وطن مش بتاعي ..
سرطان في رجلي
سرطان في أيدي
أقطعهم ولّا
أرهن حدودي لمخطط ضياعي ؟
5
ضوافري
بتنعِّم الحصي
وبتغرس البذور
وبتشيل الحشيشة الضارة ..
ضوافري حارة
عشان كده العدا
أول مابيشوفوا ضوافري
تلقاهم قزاز مكسور!!
6
النباح مش بيحجب الزغاريد
ونقيق الضفادع مش بيخنق النور
دي صرخة أسد
وصرخة الأسد مايقتلهاش كلب
حتي لو كان الكلب دا مسعور
7
الدم اللي بيروي الرملة في الفطور
أو في السحور..
رافض يكون بعبع يخوفنا
رافض يكون هزيمة في جوفنا
ومُصر يتحول ضيا
ومصر يتحول في عز العتامة نور