بركان محبة .. وانطلق

أنا ندْهتِك للقلب : كون
صوت السنابل ف الضحي،
همس المغارب للصدي،
فوق تقاسيم البنات،
قلبي اللي بات . . يحلم بضلّه ووردتين،
وسنين كتير اتبعترت بين الغُنا وبين السكات.
مدِّيته ناحية خطوتك. . مليون بُساط.. بس الخناجر ع السكك،
وأما امسِكك.. من بين سطوري تهربي
لو تندهي قلبي يكون..
عناوين عنيكِ الشاردة ف جراح المكان،
بعد اللي كان
عصفور حزين بيمني صوته بالأمان
والذكريات ضاغطة عليه الشرنقة،
يا هل تري ضحكة حبايبي عُقد فل..
ولا حبال المشنقة؟
أنا صرختِك للقلب : كمّل غنوتك،
دا العمر نظرة عين وتنهيدة لُقا،
لكن شفايف غنوته ع الناي جفاف،
قلبي اللي خاف،
واللي شب علي البُكا
ساعة ما شاف..
الكلمة واقفة ع الصليب، والصحبة
ف اسواق المدينة،
بتشد توبها ع الوشوش،
علشان تحوش..
صوت المطر.
ليصحِّي فيها الفجر نار حُمرة خجل،
وانا باسمعك ع النيل قصيدة حروفها أحلام العيال
فاجري بسرعة لتلمحيني إيدين مكتفها القلق
لكن باموت لما باعرف
اني ف ملامحك باتخلق،
وان اللي كان بيني وبينك..
بركان محبة . . . وانطلق.