فتحت عيني ع الشقا

في بلدنا شبه الطيبة
ليلة شتا
الأرض بكر موحلة
والبنت لاحسه المغرفة
ومسيره
بحرايه واطيه ومصطبه
شبرينها طين
الفرن بيسوي العجين
فيه عرصه حاميه مولعة
من فوقها قبة مسطحة
فرشه الحصير
ساعة دفا
تحت الغطا
تحصل حاجات متلخبطة
فبقيت مصير
فتحت عيني ع الشقا
مربوطة فحلة مقرفصة
بنت البهيم
الفقر قايل كلمته
مستني اسمي يكتبه
تسجيل أخير
ويا جدودي ع الجدا
دفتر فقير:
(صفحة أبويا ف وسية)
بيعبي منها الأسية
قاعد يعد ذنوب
قالب بيضرب طوب
نكش الهوا صورته
لقيته كله عيوب
قلب الزمان سيرته
سبعين خريف مشطوب
قال الزمن معيوب
(وجدي صفحته فاضيه)
يقيس العمر بالخطوة
وحيلته هدمه يغسلها
في عين الشمس ينشرها
غيامة واقفة فوق منها
ومتداري
ينادي حد ينقلها
و(ديل السبس) معكوفة
وبتجره علي السخرة
حديدة ف رجله معووجة
بيغرزها
فتطلع دنيا تلعب له
وتنصب في الحياة حلبة
بتيجي الغرب حتلاعبه
وبتنادي علي خصمه
مركب جسمه كام وصلة
وهوه جته ع العضمة
لقيته بيجري م الخضة
بيرفع لي بصبعينه
لمحت فيهم البصمة
(أبوه ميت من الحسرة)
وروحه تقلب الصفحة
لقيت صخرة
ومنقوشة دهب خالص
وكان حارس علي الموميا
ومدفونة مع الأسرة
معاه قوتها
يأكلها
يشربها
بيتوضي
ويدعيلها انها تصحي
يفوت فرعون
لقيته بيجري من (خوفو)
وبيشيله علي كتفه
وصلبينه
بمنديله
وحتة ستره ع العورة
ونقشينه علي ضهره
سبعتلاف إله بنسجد له
ونتباهه بشعر أخته
(ففريت الكتاب كله)
لحد آخر الورثة
لقيت مارد
طويل غامق
لونه بس يشبه لي
وسجينه
وعرضينه
وبينادوا علي سعره
عبيد للبيع
جمعت كل أجدادي
وصريتهم علي كتفي
مشيت سريح وبا نادي
عبيد للبيع
قابلت ابني
في منطقتي وراه جيله
بيتلون ويتكجول
ويتسيبر، وبتفرج
ومتخرج ومتعطل
معاه بؤجة فيها اخواته
وبينادي:
- عبيد للبيع!
أشب لفوق
وتحت الأرض متمغنط
فتلت الحبل بتشعبط
لقيت الخلق مقسومة علي
حاكم
يا أتباعه.. بيتباعوا؟!