الحقايق تتشاف ف العتمة

إياك تسأل:
مين نايم ف سريرك بيقيّلك؟!
وبيدخل غيبوبتك.. ويفوق.. ويموتلك؟!
مين بيشق مرايتك ف العتمة ويضحكلك ..
مين بيحاكمك؟!..وبياخدك بذنوب الليل اللي مليّل؟
الليل مش عيل مخنوق حدفاه الشمس ف حضنك
فإياك تغضب لحظة مابتتلخبط ألوانك
وإياك تغضب وتسمي جلادك..
يمكن وحده ال مستني ميلادك
يمكن زادك
لما تفوق م الغيبوبة .. ناديها
- ُرديني ياغيبوبة
طوبي للي يشوفك ف العتمة من غير شوف
ويزقك للشارع اللي مالُهش رصيف
طوبي للغيبوبة الماده ايديها ف المحنه
العتمة عتمه.. لابسه ديابة..
لكن مش كدابة
ولا غاوية تتداري ف رمز..
كنز بيشبه يوم القيامة
العتمة عتمة
لكن تشبه سيدنا اللي معلمنا القرآن
حدوده حدود ولا لُُهُش حد
سيفه ف ايده.. لكن عمره ماأقام الحد
شايف شوفه.. لكن عمره ماشافه حد
مع إنه من صلب النور
عارف الريح بتجيك إمتي
والطير الهاجج بيجيك إمتي
واللحظة الطاهرة بتموت إمتي
لاكنك لاسبت الباب متوارب
ولا عمرك قولت للشارع مين إنت
اخرج للطير الهاجج واستناه..
راجع ح يحط علي كتافك لو شافك
قول للمحنه: مسكينة يامحنة
قليله حيله وولدة موت
عمرك أقصر من نظري ف منامي
وما اشوف قدامي اكتر م اللي انا عايز اشوفه
قول للشهوة :ياشهوة يابريئة
لساني مستني مشيئه..
تحدفلي لو نص حقيقة
وترجعني لأصلي من تاني
قول للسجان الواقف علي باب الشوف:
- لا انا كارهك ولا شايفك
انا سجني بيبدأ من عضمي وبينتهي فيه
بابدأ بعثي من جوه مرايه ..
ووجعي ف بير
كوني ال زارعه جوايه اخضر
واللي ف إيدي ده رزق الطير
مابدلتش دمي بجواري..
مادخلتش داري وقولت انا آمن
ويدوبي باتعلم لغة العصافير