قصيدتان

مراية
لحظة جمود ساكنة
ف أرواح البشر
تختفي كل الحاجات
كل المشاعر والصفات
مساحيق برود..
متمكيجة..
بيها الحياة عل كل لون
لحظات بتنسي نفسها
تمسحها بالأسيتون
فتبان حقيقة إنها
من غير ماإيدنا تضمها
عمرها محدود
وكل اختصارات الآمال الممكنة
تتزق سراحة الوجود
عليها مكياج العدم
بإيدين عبيد ذاتهم
تصرخ
بمكنون الحقيقة
رغم موتها بميت طريقة
رغم الصمم
ما انتوش تروس تلف عكس الإتجاه
ما إنتوش قلوب مرسومة بالطباشير
ما إنتوش محطات للسفر
إنتو بشر
أصلكو ف الحب واحد
جدركو من شخص واحد
مهما خالفتوا المعطيات
وغرقتوا وسط السكات
فالإثباتات
تنتهي لنفس المصير
طاقة قلوبكو منفدة علي بعضها
وآهي كلها أحلام
من حقها تحلم
من حقها تنهي الخطاب.
معجزة
تتكلمي
يوصل كلامك بحري بالسماوات
تتبسمي
تمحي الحاجات
وأبقي أسير
مجبور علي الإنصات
لو تؤمري
تغيب الشمس
تبقي إنتي الدفا
والنور
لو تسرحي
الأرض هتخالف قانون كونها
وتحلف إنها ماتدور
لو تعرفي أكثر
هتلقي القلب بيقدر
كونك هنا
والأمكنة
تكسب ونسها من وجودك
إنتي القدر
إنتي الديوان المنتظر
يعيش ويتقال للأبد
إنتي الاجابة للسؤال
اللي اتطرح
..................؟
فعلا بحبك..
بقد منطوقي ف كلامي حروف
بحبك..
بقد ما اتسرب لقلبك خوف
بحبك
وأحتمل بيكي الاذي
يمكن تكوني المعجزة
وصميم إيماني بالحياة
إحساسي بيكي ميت موال
يفوقوا الجد
وبعد المد
أنا حابب
أكون الشط