مصر غالية

كنت فاكر أن دمعى راح يجف
وأن جرحى بعد صبرى راح يخف
كنت فاكرك يا وطن بعد الميدان
راح تكون أجمل بدال المرة ألف
. ..
كنت فاكر بكرة جى بنهار جديد
وأن بعد الثورة بكرة هيبقى عيد
وأن بعد الصبر فى ليالى الميدان
النهار هجيب معاه حق الشهيد
. ..
كنت فاكر أن بكرة هيبقى أجمل
وأن كل الهم عن وطنى هيرحل
كنت فاكر أن بعد سنين عِجاف
راح نلاقى سنين حياتنا فيها أسهل
. ..
كنت فاكر أن دقن الشيخ علامة
أنه خايف لسه من يوم القيامة
كنت فاكر إن مصر هتبقى أجمل
وأن بعد الثورة هنلاقى الكرامة
. ..
الحكومة من جديد خاب ظنى فيها
حتى لقمة عيش بدوّر مش لاقيها
لازم أرجع تانى لليالى الميدان
مصر غالية وتانى لازم نفتديها
. ..