أنا المصرى

*****
أنا المصرى ...
*****
أنا الفلاح بجلابية
أنا العامل فواعلية
أنا الإنسان
*****
أنا الأستاذ بطباشيرُه
وصوت قرآن وتباشيرُه
أنا الفنان
*****
أنا الرقصة فى أفراحي
وفى جراحي
بتطلع رنة الموال
من الأحزان
****
أنا الرسام بلا ريشة
ملاية لف والبيشة
ونظرة حب بقشيشة
تسيبنى فى الهوى حيران
****
قرصت الزهر عل القهوة
وصاحبى يطرقع الضُومَنَة
بنتخانق على سهوة
ونتصالح اذا قُمنا
وشغل جنان
****
أنا المشهور بدار كَرَمي
على نيلى بنيت هَرَمي
شقا أبويا ودُعا أمي
فَتحْلى بالحنان
أحضان
*****
على ظهرى خطوط حمرا
بطول وبعرض
كرابيج .. فى إيدين سجان
****
ومن دمى نُقط حمرا
بترسم ورد
على القطر و
على القضبان
****
و فى الحرب تلاقينى سد
ما يقدرعليا حد
بطول الليل وعرض البرد
بافرش بالأمل بستان
****
أنا حورس و أنا أحْمُس و أنا أوزوريس
أنا الحرف وأنا الكراريس
أنا القديس
أنا العنوان وأنا المعنى
أنا الغنوة و أنا المغنى
وكان يا مكان
****
صنايعى تقيل ومالى حظوظ
ده أنا المازنى و أنا طه و أنا محفوظ
أنا المقصود بالدعوة وأنا المخصوص
أنا بوابة الأديان
****
أنا الأرابيسك متنقرش خطوط من نور
أنا زرع الغيطان الأخضر سواقى تدور
خَبزْت اللقمة من عرقى .. وقفت طابور
وخطفوا لقمتى الغيلان
****
جابولى العِلًّة فى كِبدي
وباعولى الدوا غالي
ونهبوا مصنعى وأرضي
منين أصرف على عيالي
وأنا عيَّان
****
لهيب الثورة فى قلبى ..
لا شئ يطفي
ولا بَهْدَا
أنا بس كنت باشيل على كتفي
جُثث شُهَدَا
من الميدان
****
ولمَّا رِجِعِتْ للثورة
أكملها وسلِّمها
لقيت اللوحة مقطوعة
لقيت الرسمة ممنوعة
على الجدران
****
أنا المصرى ...
****
أنا اللى احتلوا قراريطى خواجة وندل
رسمت الوشم على صدرى ميزان العدل
ومهما حاولوا يِكْوُنى بنار الذل
أنا فى الآخر الكسبان
لاجنكيزخان
ولا اللنبى هيمحيني
ولا الإخوان
****
أنا المصرى ..