مكملتش ست شهور وبنيت بينك وبين الشعب ألف حيطة سد الشعب فى انتظار الثورة اللى بجد فين كلامك فين وعودك يا صاحب الوعد وللتذكرة اللى يشيل مبارك يشيل أى حد واوعى تستبعد أى ثورة تانية أنا بكلمك بجد الناس دابت فى الفقر والقهر أنت بنفسك قلت بدل المرة الف الرئيس أجير عند الشعب طيب السؤال أنت فين من الشعب الناس كلها بتخبط فى بعض الكل عايش فى غلب وأنت مش هنا سيبك من خطب الجمعة اللى لا فيها أكل ولا شرب الناس عايزه حلول ع الارض أنا مش عايز الاسلام يبقى ذنب فكرتنى بمبارك لما كان قرفان من الشعب ومقضى حياته لعب فى لعب ومتهنى لوحده فى شرم ومحروق أبو الشعب أهم حاجة عند سيادتك دلوقتى هو القرض ملعون أبو القرض وملعون صندوق النقد الموضوع مش ناقص عند تمانين سنة وأنتم بتقولوا الإسلام هو الحل ولما وصلتوا للحكم بقى القرض هو الحل غلبت أقولكم الكنز الحقيقى هو الشعب وبلاش وجع قلب تعبنا من الغلب عايزين نحسوا أن فيه عدل ممكن ولا صعب أمتى البلد هاتبقى بلدنا ولا مكتوب علينا نعيشوا فيها غرب مش عايز حد يقولى الراجل لسه ماسك كل اللى علينا شوية صبر أحنا صبرنا تلاتين سنة مش معقولة الحال يتصلح فى كام شهر لا يتصلح بس لو فيه نية وضمير وقلب أنا يا سيدى طماع وعندى طموح ونفسى أحس بالفرق بين اللى قامت عليه الثورة وبين الرئيس مرسى رئيس الثورة ممكن ولا صعب كفاية كفاية ظلم أنا مش عايز حد يزعل منى أنا ما بكتبش شعر ومش مهم عندى الوزن ولا الفعل المهم عندى هو الشعب وكل اللى عليا ان اقول كلمة حق أنا عايز أعرف إزاى نصدروا كهربة وإحنا محتاجين إزاى ننوروا حولينا وإحنا مضلمين إزاى تبقى الرشوة شغالة والواسطة شغالة وأحنا عاطلين لحد امتى هانفضلوا شاربين المر وشايلين الطين بقالنا سبعين الف سنة ومش عارفين نقولوا للعالم دلوقتى أحنا مين إحنا اللى بنستوردا لقمتنا وهدمتنا وسلاحنا إحنا اللى تايهين ومش عارفين الشمال من اليمين واللى عايز يهد الهرم وأبو الهول أنا مش عارف ابو الهول زعل مين وانا عايز أقول فين الاسلام يا مسلمين كنا زمان بنقولوا محدش بينام من غير عشا أنا بقالكم نصوا البلد بينموا جعانين أنا عايز أقول أننا معندناش دم ولا أخلاق ولا ضمير ولو مش مصدقنى زور اى مستشفى وشوف الناس التعبانين لف فى الشوارع وشوف الغلابة والمحتاجين وبالاسم بس إننا مسلمين اللهم اغفر وارحم فأنت خير الراحمين ياريس أنت فين كان نفسى أقولك كلمتين ماليش دعوة بالإعلام ولا الإعلاميين أنا عارف إن نصهم كدابين هى دى بلدنا بجد ولا بلد مين؟؟؟؟؟؟ ولو هى بلدنا أنا حقى فين ؟؟؟؟ ومش حقى لوحدى حق الملايين والغلابة والمطحونين عايزين نحسوا أنها بلدنا ولو يومين ولا مكتوب علينا نعيشوا فيها متغربين والحزن نفسه علينا حزين هانفضلوا لحد امتى كدا تايهين هى دى بلدنا ياريس ولا بلد مين؟
