بائعة المانجا

اقترب موعد السفر ومرت الإجازة وكأنها يوم كالعادة، وبعد مرات من التأجيل والتعليل الذى أصبح بلا مبرر قررت أن أبدأ فى استخراج الأوراق المطلوبة من تصريح سفر وعمل وخلافه، وبالفعل حضرت الأوراق جميعها رغم أننى أعلم أنها ناقصة فالروتين هو صاحب الكلمة الأخيرة فى ذلك الشك، وفى صبيحة اليوم التالى تحركت من بيتى متوجها "إلى محطة الباص التى تبعد عن بيتى مسافة ربع ساعة سيرا على الأقدام، وصلت محطة الباص ونادى على المنادى قبل أن أصله قائلا: "الزقازيق يا بيه" أجبته بهزة رأسى واتجهت نحو الباص وما إن وطأت قدماى سلم الباص، وجدت أمامى امرأة عجوزا أعتقد أنها تجاوزت الثمانين من عمرها تبكى بحرقة وتقول "حسبى الله ونعم الوكيل ربنا ينتقم منك وما تكسب أبدا"، فاشتد انتباهى لها حتى جلست على أول مقعد قابلنى فانتبهت هى لى وعلمت حينها أنها بداية يوم غير مبشر بالمرة، وقلت لها "اهدى يا حاجة بتعيطى ليه على الصبح كده قوليلى ممكن أساعدك"، فردت على قائلة "اللى ربنا ينتقم منه سرق منجتى من سبَتى اللى صحياله من الفجر عشان أبيعه فى السوق"، فقلت لها: "سرقها منك إزاى يا حاجة ما أنتى معاكى سبتك قدامك أهوه"، فردت مسرعة: "لا يا بنى أنا كان معايا سبتين وواحد منهم اتسرق يعوض عليا ربنا أصل أنا ركبت عربية من بلدنا اللى ليها صندوق دى"، فقلت لها "أيوا أعرفها"، فقالت: "أيواا أكملك حطيت السبتين فى الصندوق بتاع العربية وقعدت فزعقلى السواق قلى سبت واحد معاكى والتانى تحطيه فوق صندوق العربية فقلتله ماشى يا ابنى فأخده واحد من الركاب منى، ورفعه فوق الصندوق ويا ريته يا بنى ما رفعه"، فقطعت العجوز كلامها ببكاء شديد فقلت لها: "كملى يا حاجة واهدى"، فقالت، وهى تمسح وجهها من الدموع "وبعد ما مشيت العربية وقفنا فى كمين قول عشر دقايق ومشيت العربية وبعد ما وصلت المدينة اللى فيها السوق نزلت ومعايا السبت وقلت لواحد من اللى راكبين فوق الصندوق ناولنى السبت يا بنى اللى جنبك وراح منزلى السبت يا بنى بإيد وحده فاستغربت فقلتله مش ده يا بنى التانى مليان مانجا، فقلى بقولك إيه حاجة مفيش غيره فوق وخلصينا بقى فمسكت فى هدومه وقلتله يبقى أنت اللى سرقت المانجا وديتها فين بقى مش هسيبك فشد ايدى وقلى شوفى أنتى رايحه فين يا بنت كذا وكذا مش ناقصك فنديت على السواق وقلتله إن الراجل ده سرق المانجا بتعاتى فقلى ياحاجه أنا مليش دعوة بالقصص دى أنا سواق وبس وقرب منى صبى من الركاب فقلى يا حاجه الراجل ده رمى المانجا بتعتك للعساكر والظباط اللى كانوا واقفين فى الكمين ده غير اللى قعد ياكله طول السكة استعوضى ربنا ده حشاش وحرامى أنا عارفه ومش هتخدى منه لا حق ولا باطل فبصيت حولى لقيت الحرامى اختفى من قدام عينيا" فبكت العجوز ثانية واشتد غضبى وسألت نفسى أين ذهبت النخوه والشهامة!، فعادت المرأه بحديثها: "أنا يا ابنى من بيت أصل وبعد العمر ده كله ييجى واحد أد حفيدى ويسبنى بأهلى" فقلت لها "معلهش يا حاجه ربنا يعوضك خير وياخد حقك" فردت عليا قائلة: "ربنا يرضيك يا بنى ويعوض عليا فى السبت التانى بس مش مسمحاه أبدا".
وبعد أن أعلنت بائعة المانجا أنها لن تسامح سارق قوت يومها كان الباص قد اكتمل عدده وانطلق السائق فى طريقة إلى مدينة الزقازيق إلى أن وصل فى ميعاده ونزلت أمامى بائعة المانجا وحملت سبتها المملوء بالمانجا والفارغ أسفله ووضعتهم على رأسها ومشيت وهى تهمهم بكلمات لم أفهمها وسرت أنا فى طريقى لإنهاء أوراقى، وبعد يوم طويل من الطوابير والإرهاق لم أستطع أن أنجز من أوراقى شىء كعادتى مع الروتين، فقررت أن أعود فى يوم آخر مهما كان العناء لأنه ليس كعناء بائعة المانجا.