"استفت قلبك" قصيدة لأشرف الشافعى

استفتِ قلبك لحظة المحنة
كفايانا نبدر شوك ف مطارحنا
ح ييجى يوم نكره ملامحنا
لو سيبنا روحنا لسكة الأوهام
استفتِ قهرك وانت ف البالون
راكع وفوق راسك حرس ملعون
إستفتى طفل بيبكى ف البلكون
مستنى ابوه يرجعله لجل ينام
استفتِ مينا وشُهدا ماسبيرو
والشيخ عماد حرمونا تكبيره
رب العباد رايد بتدبيره
يرفع مابينا ناس ف أعلى مقام
استفت واوعى تنسى صرخة أنس
فكر ف حضن امه اللى فارقه الونس
وف بنت عروها بإيدين الدنس
وف ندل سابها وجاب عليها ملام
استفتِ دم الشهدا ف الميادين
وناس عشانك دفعوا ضى العين
إستفتى جرحك والشيوخ قاعدين
بيقولوا ضبط النفس بقى إلزام
استفتِ بنتك بُص ف عيونها
واسألها ليه الخوف بيسكنها
ماقدرش ليه حضنك يطمنها
وكأن بقى بينك وبينها خصام
استفتِ إبنك واوعى تستهتر
تزرع ف أحلامه الجحود يكبر
ومحال ح ييجى يوم عليه يقدر
يعرف يفرّق بين حلال وحرام
استفتِ وجعك ف البُكا والضيق
إستفتِ خوفك من كمين ف طريق
صرخة هتافك لما كنت جرىء
هزمت بيها سلطة ويا نظام
استفتِ ضربة غدر جايالك
وامسك ف آخر فرص باقيالك
إستفتِ حلم حلمته لعيالك
نفسك تموت ويعيش سنين قُدام
استفتِ بكره واسأله ليه غاب
وسابنا ليه تايهين كما الأغراب
عشّمنا ييجى ويفتح الأبواب
وخَلّف وعوده وسخّف الأحلام
استفتِ شوقك للبراح والنور
لامتى هتعيش دنيتك مجبور
العلة مش ف استفتا ولادستور
العلة مين أحرار ومين أغنام