سلف ودين

يا مصر قدامك نفق
بنعدى فيه
بنشوف حاجات
حملك تقيل
والليل طويل
حابس عشانك ذكريات
عايزين نعيش بره النفق
وندوس على الجرح اللى فات
عمرى اللى فات
البحر كان بيلمنى
والموجة عالية من زمان
والحلم مات
يا مصر قدامك يا غاليه
مزلقان
هنعدى امته يا وطن
ما تقول لى امته نعيش امان
برك بعيد
كل البلاد ترسم وطن
وانت اللى بتدور مكان
خمسين سنه
ما قادرش اوفر لقمتي
ضهرى اتحنى
شيلت العيال لفيت بلاد
يشهد طابور العيش
وسور المزلقان
فكرت اسافر يا وطن
فاضل يومين
ختم الخروج شاهد على
دموع العنين
طيارة واخده الحلم
تانى لحد فين؟
طيارة بتلم الحاجات
البوم صور
شنطة سفر
حلم السنين
ختم الخروج
وانا كنت حاضنك يا وطن
ماسك حدودك بالايدين
بتقولى روح
خمسين سنه
بتغطى جسمى بالجروح
قضيت حياتى سلف ودين