أمير طعيمة يهنئ حماقى بنجاح ألبومه الجديد "من قلبى بغنى"

هنأ الشاعر أمير طعيمة صديقه النجم محمد حماقى بنجاح ألبومه الجديد "من قلبى بغنى" والذى يشارك فيه طعيمة ببعض الأغنيات، حيث كتب على صفحته الخاصة بموقع "الفيس ببوك" "مبروك للنجم الخلوق والمبدع دائما لحماقى ولكل فريق العمل اللى تعبوا سنتين عشان يطلع الألبوم ده للنور، بخبرتى بقيت بعرف مين اللى بيدخل ينقد نقد موضوعى وبناء ومين اللى بيدخل عشان فى قلبه حاجة مش مظبوطة، شكرا لكل حد قال نقد مفيد، أما الناس التانيين "فموتوا بغيظكم".. إحنا مستمرين لإمتاع الناس اللى بنحبهم وبيحبونا.. واللى بيحبنا بيبان من نقده حتى لو سلبى.. أما اللى داخل يشتم وخلاص فبقوله: ".......... والقافلة تسير" ... إلى كل أحباء حماقى استمتعوا بالألبوم، وأى حاجة مش عجباكم أكيد هنصلحها فى الأعمال القادمة إنشاء الله، ربنا يدينا ويديكم طولة العمر. "أمير طعيمة".
كما وجه طعيمة الشكر لكل فريق عمل الألبوم، حيث كتب "أنا عايز أشكر كل فريق العمل واحد واحد، الموزعين: توما، تميم، حسن الشافعى وأحمد إبراهيم أبدعتم وتفوقتم على نفسكم، المنافسة القوية اللى بنكم كانت فى مصلحة العمل، عمرو مصطفى عودة قوية جدا وإضافة كبيرة، أيمن بهجت قمر ومحمد يحيى ثنائى اتعودنا منه على الإجادة كالعادة، أحمد صلاح حسنى خطوة عملاقة وكان قد المسئولية، محمد عاطف: كالعادة حتى ولو بأغنية واحدة إلا إنه بقى ركن مهم جدا فى ألبومات حماقى، خالد عز وخالد تاج برضه أغنية واحدة بس جوووون، مدين: أغنيتيتن من أفضل أغانى الألبوم، أحمد الجندى واضح جدا إنه مشروع لشاعر هيكون ليه وجود قوى فى الأيام اللى جيا، محمد صقر نجم كالعادة، ياسر خليل الجندى المجهول كالعادة وزاد عليه جندى مجهول جديد وهو كريم الحميدى. ألف ألف مبروك وشكرا للجميع وشكرا لنجوم ريكوردز اللى ما بخلوش لا بوقت ولا بمال عشان يطلع العمل بهذا الشكل. سيبكوا بقى من السياسة كام يوم واتمتعوا بباقى الصيف وبألبوم حماقى".