باسم يوسف يكشف ل كلمة أخيرة سبب ظهوره بالقنوات المصرية: علاقتى قوية بأستاذ طارق نور

علق الإعلامي باسم يوسف، في أول ظهور له ببرنامج "كلمة أخيرة" الذي يذاع على قناة "ON"، على سبب عودته للظهور مرة أخرى في الإعلام المصري.
وقال خلال لقائه مع الإعلامي أحمد سالم: "الموضوع ده له دعوة بعلاقة شخصية بيني وبين الأستاذ طارق نور، واللي الناس متعرفهوش إن احنا الاتنين في علاقة صداقة طويلة جدا، وحتى لما سيبنا مصر كان دايما بيودني ويسأل عليا".
وتابع باسم يوسف: "في حاجة حصلت مكنتش متوقعها آخر سنتين، أنا لاقيت أهلي من مصر، بيقولوا لي الحق الفيديوهات اللي بتظهر فيها مع بيرس مرجان وغيره، بتنزل هنا في التلفزيون المصري، ولما سألت بتنزل فين قالوا بتنزل في القاهرة والناس، وكنت مستغرب، وكان أستاذ طارق دايما بيهنيني".
وقال: "في مرة كنت بصور برنامج عرب جود تالنت، وكلمني وقالي أنا جايلك، وجالي الرياض، وقعدنا، وكريم ابنه صديق عزيز، وقعدنا أن والفريق بتاعي، وقالي بص يا باسم، الكلام اللي بتقوله ده، لازم تقوله في التلفزيون المصري، أنا قولت انا بقالي فترة مش بطلع، ومعرفش توقعات الناس، وقالي تعالى وقول نفس الكلام والموضوعات اللي بتتكلم عنها هنا".
وتابع: "قولت لأستاذ طارق نور، أنا معتقدش ان الناس عاوزاني أرجع مصر عشان أكرر نفس كلامي اللي بقوله عن فلسطين، الناس فاهمة فلسطين أكتر مني، فقالي ليه متعملش الموضوع ده من خلال تجربة شخصية، احكي من ورا الكواليس".
وأوضح: "بصراحة كنت متردد أوي، ودلوقتي، أكيد في ناس وصلت للجزء ده من البرنامج وأحبطت، بس أنا بشوف اننا نعمل اللي علينا، وتطلع تتكلم يمكن كلامك يفيد حد أو يفرق مع حد، والحلقة دي متعلقة بالخلفية بتاعت شخصيتي أنا".
باسم يوسف: قعدت 11 يوم مبخرجش من البيت بعد 7 أكتوبر بسبب "البروباجاندا" الغربية
وكشف الإعلامي باسم يوسف عن قوة علاقته بالإعلامي بيرس مورجان وأسباب عدم ظهوره مؤخرا معه، متابعًا: "7 أكتوبر حصلت، يوم 10 أكتوبر كلموني، وهنا قولتلهم أنا مش هقدر أطلع، وفضلوا يسألوني مرتين وأنا أقول مش هطلع".

وتابع: "أنا قلت لا .. لأن البروباجاندا اللي شوفناها في أمريكا، غير اللي انتم شوفتوها خالص، الناس كانت بتتكلم عن ذبح أطفال صغيرة، واغتصاب جماعي، وحرق جثث".

وواصل حديثه: "البروباجاندا كانت مرعبة لدرجة إني مكنتش عارف أخرج من بيتي، لدرجة ان في ناس أصحابي كلموني وشتموني، وقالوا لي انتم إرهابيين ووحوش".

وتابع: "أول مرة طلعت مع بيرس مورجان، كان يوم 18 أكتوبر، وال 11 يوم من بعد 7 أكتوبر، أنا كنت مستخبي في البيت مش عاوز أطلع، لأن حجم الدعايا كان فوق الخيال، وفي الوقت ده الناس قالت انت جبان مبتطلعش ليه".

وقال: "يوم 18 أكتوبر قررت أطلع، والإيجنت بتاعتي كلمني قالي انت بتنهي مستقبلك بالموضوع ده".

وأوضح: "أنا حاسس إني من بعد 7 أكتوبر، اتعلمت حاجات كتير جديدة عن القضية الفلسطينية، وقبلها كنت فاكر اني اعرف حاجات عن فلسطين، لكن اكتشفت اني كنت جاهل، من الحاجات اللي اتعلمتها، انك ممكن تبقى معاك الحق والمعلومات، لكن يغلبوك بالمجادلة وازاي تقع في كماين".

وقال: "اتعلمت ان الناس اللي بتدخل مناقشات اون لاين، بيبقوا معاهم حق ومتحمسين، لكن بيعطلوا في مطلبات، ويمكن الي عاوز أحققه بالحوارات دي، أني أقول اللي التجربة الشخصية والكواليس عشان الناس تسمعه، وانت لما بتدخل نقاش على الانترنت انت بتدخل مع ناس مدربة جدا، وبيعرفوا يوقعوك".