عمر مرموش فى حوار مع إسعاد يونس: منتخب مصر بالنسبة ليا حاجة كبيرة وبمثل 120 مليون مصرى.. ومحمد صلاح صديقى وله تاريخ كبير وبتعلم منه وبيساعدنى.. وأمى مبتتفرجش عليا وبتدعيلى كتير واللى أنا فيه ده بسببها

عمر مرموش: اتعودت على الجماهير.. وإسعاد يونس تعرض عليه سحلب ومغات
عمر مرموش: فرانكفورت فريق مميز وبشتغل على نفسى لإحراز أهداف كثيرة
عمر مرموش: سجلت فى 3 مباريات 3 أهداف من فاولات بعد تمرين مستمر
عمر مرموش: لما بنزل الملعب بتحول.. وهذا لاعبى المفضل على البلاى ستيشن
عمر مرموش: بحاول أبسط الناس بأقل حاجة وجمعت 12 ألف حذاء ووزعتها فى النوادى
عمر مرموش: أخويا ورونالدينيو مثلى الأعلى.. وبخلى الفرقة ترقص على "آه يا قلبى" لحكيم
أكد عمر مرموش، نجم منتخب مصر ونادي آينتراخت فرانكفورت، أنه لا يخشى الجماهير داخل الاستاد، متابعا: "أنا مش بتخض من الاستاد واتعودت عليه.. وبقالى هنا 7 سنوات".
وأضاف عمر مرموش، خلال حواره مع الإعلامية إسعاد يونس، فى برنامج "صاحبة السعادة" المذاع على قناة dmc: "استاد النادى يشهد إقامة حفلات وده الفرق بينه وبين الاستاد العادى.. واحنا كفرقة نستخدم الكاميرات من فوق علشان نصور الملعب كويس ونذاكر الفريق بشكل كويس".
وعرضت عليه إسعاد يونس تناول السحلب والمغات وقرفة باللبن، قائلة: "علشان تدفيك من السقيع".
وأشاد عمر مرموش، بفريقه، قائلا: "الفرقة مميزة وكأننا عيلة واحدة، ومعانا لاعب سورى صديقى لأن طقوسه شبهنا شوية".
وعن تنافسه على لقب هداف الدورى الألمانى مع هارى كين، قال: "المنافسة خلتنى مش شايف مين اللى قدامى، وباصص فى اللى بعمله وبتمرن كويس علشان أحرز أهداف كتير".
وأضاف عمر مرموش، "أنا وهارى كين على نفس المستوى، وهدفنا واحد وبنسابق بعض فى الحصول على الهداف وبشتغل على نفسى علشان أكون هداف، وإن شاء الله هحقق حلمى".
وتحدث مرموش، عن انتقاله إلى نادي آينتراخت فرانكفورت، قائلا: "أنا بلعب فى النادى من سنة ونص.. والسنة دي ماشيين بشكل كويس والفرقة بتلعب بطريقة مختلفة.. وده ساعدنى إنى أظهر بالمنظر ده.. وحققت أرقاما كويسة السنة اللى فاتت، والسنادى أفضل".
وأضاف :"منتخب مصر بالنسبة ليا حاجة كبيرة، وكلنا هدف واحد وهو تمثيل مصر بشكل كويس ونحطها فى مكانة عالية، وأنا بلعب باسم بلدى ومش عاوز حد يكسبنا ويضحك علينا كمان.. بمثل 120 مليون مصرى وشايل اسم مصر على ظهرى.. وده بيفرق معايا، وكلنا عندنا نفس الروح والهدف أننا نكسب بلدنا".
وتابع مرموش: "خلال بطولة أفريقيا الماضية أول ما وصلت البلد اللى هنلعب فيها كانت درجة حرارتى كبيرة.. وقلت للدكتور هلعب يعنى هلعب حتى ولو درجة حرارتى 80 درجة.. وحصلت على أدوية، وأنا بمثل بلدى ولما هنزل الملعب هعمل كل حاجة".
وقال عمر مرموش: "أنا فى 3 مباريات ورا بعض جبت 3 فاولات أهداف، ودى كانت حاجة من إنجازاتى وكنت بتمرن عليها من زمان".
وأوضح مرموش: "ضربات الجزاء لما يضيعها اللاعب المدرب ممكن يغيرك، ولما باجى ألعب كورنر وأجيب جون بحس إنى كويس فى الحاجات دى، وبحاول أحسن من نفسى علشان أوصل لحاجة كبيرة".
وأضاف: "بندرس إيه الزاوية الصعبة لحارس المرمى لأن التفاصيل الصغيرة بتفرق معانا، وتأسيس الأطفال فى اللعب شىء مهم، وبعدها بتيجى الموهبة بتاعته اللى هتخليه ينجح".
كما تحدث مرموش، عن دوره فى الملعب عقب لمس الكرة، قائلا: "لما بدخل الملعب بتحول، بكون بره لذيذ وطيب وفى الملعب بتغير، ومحبش أخسر وعاوز كل اللى حوليا مركزين ومصحصحين، وبحاول أكون إيجابي ومفيد مع الفرقة".
وعن لاعبه المفضل على البلاى ستيشن قال عمر مرموش: "بلعب بلاي ستيشن بنفسى فى النادى اللى بلعب فيه، وبقول لنفسى فى اللعبة إيه ده متشوت عدل، وبكلم نفسى أنت كويس هتجيب جون ومش مشكلة فى الفرصة اللى ضاعت هتيجى فرصة تانى".
وتابع: "اللاعب بيكون مضغوط من أهله واصحابه وكل الناس، والكورة يوم فوق ويوم تحت، وبحط لنفسى مستوى معين أثبت عليه، وبفكر بنفسى أنا مين وعملت إيه ووصلت لدا كله إزاى؟، وديما بحط لنفسى مستوى معين علشان أقدم ماتش كويس".
وأشاد مرموش، نجم منتخب مصر ونادى آينتراخت فرانكفورت، بالنجم المصرى محمد صلاح لاعب المنتخب المصرى وليفربول الإنجليزى، قائلا:"دا بيؤكد أن مصر بها مواهب ولاعبين كبار، وعلاقتى ب"مو" كويسة واحنا أصحاب وباخد من خبراته، وماشى بشكل كويس، وفرحان إن فى منتخب واحد زى صلاح فى منتخب بلدى وصل لمكانة كبيرة وفى نفس الوقت عاوز أعمل مكانة لنفسى".
وأضاف عمر مرموش، أن محمد صلاح أحسن لاعب جه فى أوروبا وله تاريخ كبير، وأنا عاوز أعمل قصة لوحدى وبتعلم منه وديما بيساعدنى وإزاى أطور من نفسى وشرف لى أتعامل وأتعلم من صلاح".
وتابع: "صلاح ساعدنى لما جيت المنتخب، وقالى اللى هيفرق معاك لو اشتغلت "مينتال"، وهى أن اللاعب بيمر بضغوطات كثيرة وعليه أن يتعامل مع هذه الضغوطات بطريقه تفيده، وميتكبرش ويكون شايف نفسه لانه هيفرق معاه فى الملعب علشان يكون شخص مكتمل، وعدم السماح لأى شيء يشتته، وبنصح كل لاعب بان ينظر لهذا الأمر وميتأثر بحد".
وأكد مرموش، عن سعادته خلال محاولة إسعاد الجماهير المحبين له، قائلا: "بحاول أبسط الناس بأقل حاجة لما يتصوروا معايا، والصورة بتفرق معاهم والكلمة الحلوة بردو بتفرق".
وأضاف مرموش: "قدمت مبادرة (باصيها لغيرك) لمساعدة المصريين لتوفير أحذية رياضية للشباب فى النوادى لينزلوا بها الملعب زى كل الناس التانية ويوصلوا لحلمهم، وجمعت 12 ألف حذاء جديد ووزعتها على المصريين".
وقال مرموش: "مبلعبش أى ماتش بجزمة جديدة، وأول لبس لأى جزمة بتمرن بيها 4 أيام، ومش ديما بيغر الجزمة".
وعن حياته فى ألمانيا قال مرموش: "عايش لوحدى وبحب غزل البنات، وأمى بتدعيلى بكل حاجة حلوة، بتقولى (خلى بالك على نفسك وكل واشرب كويس)".
وأوضح: "أمى مش متابعة الكورة كويس، ومبتتفرجش على ماتشاتى لأنها بتكون قلقانة عليا، وبتقعد جمبى وانا بحضر الشنطة وبتقولى أحطلك حلاوة؟، واللى أنا فيه ده بسببها لأنها كانت بتوصلنى التمرين وتودينى المدرسة، ولما الناس عرفتنى قالتلى إيه اللى بيحصل ده انت عمر بتاعى.. ويا رب دايما أشرفها هى ووالدى وفضلهما كبير عليا".
وعبّر مرموش، عن حبه لشقيقه، قائلا: "أخويا مثلى الأعلى، وكنت بقلده، وكان بيفرجنى دايما على فيديوهات كورة، وكان مهتم بالكورة وكان حريف، وسريع وقوى".
وأضاف مرموش،: "وفى الكورة كنت بحب رونالدينيو، وكان لاعب كبير ومثلى الأعلى".
وتابع: "ملابسى ملهاش علاقة بموديل معين، وبحب المزيكا وباسمع كل الأنواع وبشغل الأغانى فى النادى منها أغنية (آه يا قلبى) للمطرب حكيم وبشغل أغانى شعبى، وبيرقصوا عليها فى النادى، وبديهم تقاليد مصرية وأغانى، وبحب السينما لكن مش بروحلها كتير وبلعب رياضة تانية"، وخلال الحلقة وبجو ملىء بالفكاهة والضحك ومن باب الدعابة وافقت إسعاد يونس وعمر مرموش على تقديم مرموش أفلام فى السينما خلال الفترة المقبلة.