الرئيس السيسي: توافر الغاز الطبيعى ساهم فى إنشاء مجمع الأسمدة الأزوتية.. نسابق الزمن لزراعة 3.5 مليون فدان.. وضعنا سعر ضمان للقمح والذرة والفول الصويا وعباد الشمس.. ومشروعات التوسع الزراعى تقلل فاتورة الاستيراد

الرئيس السيسي: "اللى بيتعمل من مشروعات فضل كبير من ربنا ويحتاج أموالا طائلة"
الرئيس السيسي: مشروع مجمع الأسمدة الأزوتية به محطة معالجة مياه خاصة
الرئيس السيسي: تكلفة مشروعات المعالجة الثلاثية بالدلتا الجديدة وسيناء كبيرة جدا
أكد الرئيس عبد الفتاح السيسي، أن المشروعات التي تنفذها الدولة تحتاج إلى تغطية إعلامية كبيرة، قائلا: "محتاجين تغطية إعلامية حقيقية.. ده شغلنا يا دكتور مصطفي.. من حق الناس تشوف الكلام ده.. اللى بيتعمل من مشروعات زراعية فضل كبير من ربنا.. والله والله أرقام مالية هائلة.. ثم جهد عمل يبذل لتنفيذ هذه المشروعات.. وجهد يفرح الناس.. اننا متحركين.. علشان أوصل ل 2 مليون فدان.. بنتكلم في حاجة تانية خالص غير كلام وزير الزراعة.

وأضاف الرئيس السيسي، خلال افتتاح مجمع مصانع الأسمدة الأزوتية بالعين السخنة: "عاوزين نوري الكلام ده للناس في مصر.. فيه جهد وتكلفة كبيرة جدا.. نحاول نقلل من فجوة الغذاء.. لكن يظل النمو السكاني تحدي كبير".

وتابع الرئيس السيسي: "بنتكلم عن 2.5 مليون فدان من خلال إعادة معالجة الصرف الزراعي.. وبنعمل محطات معالجة ثلاثية بتكلفة كبيرة.. وارجو ان النقطة دي تكون في التغطية الإعلامية.. وانا لقيت ناس متطوعة بتتكلم عن المشروعات دي.. ولقيت حاجات على اليوتيوب وناس منزلة مراحل من دي.. ده جهد مشكور.. بس بقول لينا وللإعلام نحتاج إلى المزيد من التغطية الإعلامية".

وأكد الرئيس عبد الفتاح السيسي، أن مشروع مجمع الأسمدة الأزوتية له محطة معالجة مياه خاصة، موضحًا: "المياه التي تستخدم كمياتها كبيرة هنا.. وعملنا محطة معالجة خاصة لها، بتوفر حوالي 50 ألف متر يوميا، بتيجي من البحر الأحمر عبر مواسير تم مدها من المحطة حتى هنا، ويتم إعادة تدوير لمياه الصرف الصناعي واستخدامها مرة ثانية أو للحفاظ على البيئة".

وأضاف الرئيس السيسي: "كنا دايما بنشوف في مشروع زي كده اشتراطات البيئة.. البيئة لها فقرة خاصة.. وتم التأكيد على مراجعة الاشتراطات البيئية في تنفيذ هذا المشروع".

وقال الرئيس عبد الفتاح السيسي، أن الحكومة اتفقت على إعلان أسعار ضمان لبعض المحاصيل الزراعية، قائلا: "احنا كحكومة اتفقنا على إن نعمل إعلان أسعار ضمان ل 4 سلع، القمح والذرة والفول الصويا وعباد الشمس، ولذلك بطمن الناس، والضمان يعني الحد الأدنى للدفع.. لو السعر العالمي أكثر هندفع أكثر.. لو القمح تعاقدنا على رقم.. ده الحد الأدنى.. طب زاد القمح هنشتري بالسعر وقت الحصاد.. بأكد على النقطة دي لكل القمح والذرة والفول الصويا وعباد الشمس".

وشدد: "بقول للفلاحين والمزارعين.. الأرض اللى معاكم غالية جدا جدا جدا جدا.. استفيدوا منها بدل التعدي عليها.. العالم كله عنده مشكلة في الإنتاج الزراعي والطلب بيزيد علشان النمو السكاني، أرجو أن نخلي بالنا ونخدم عليها علشان تجيب خير الفترة الجاية".

أكد الرئيس عبد الفتاح السيسي، أن مصنع الأسمدة الأزوتية يدعم زراعة 3.5 ملاين فدان، موضحًا: "المصنع ده يدعم زراعة 3.5 مليون فدان.. دول بالكتير نصف العام المقبل أو آخره إن شاء الله".

وأضاف الرئيس السيسي: "بنبذل جهد كبير علشان الرقم ده يتحقق.. 3.5 مليون فدان.. اتعودوا معايا عليها.. إن شاء الله بحاول أكون صادق وأمين معاكم في كل كملة، مش نوعد وخلاص، لما بنوعد بنوعد اللى هنقدر ننفذه".

وتابع الرئيس فى كلمته: "التغطية الإعلامية للمشروعات دي هتدي للناس إحساس كبير باللى بيحصل، خاصة في ظل الزيادة السكانية، بنتكلم في 20-25 مليون مواطن زيادة سكانية خلال آخر 10 سنين.. لو مش عندنا إنتاج يقلل حجم الطلب من برة هتبقى فاتورة الاستيراد هائلة وضخمة".