حاول

سافر.. هاجر ..
اوعى تفكر مره تعود
ابنى ف قلب الزحمة مبانى
والمستشفى حسب المود
جرب مرة بدل العجلة
تركب حوت..
أو تتعشى بدل اللحمة
شوربة توت..
جرب إنك تفرح مرة
الأيام بسهولة تفوت
عيشة تفوت ...
ولا حد ف قلب الموت بيموت
جرب إنك تضرب روحك بالنبوت
ولاّ تربى تحت جناحك
كام كتكوت..
أو تحسبها ف يومك بالسحتوت
جرب إنك تقبض بدل الفكه
علقة موت ..
جرب مرة إنك تسمع من غير صوت
اسرق بدل المرة اتناشر
واطلب من نشالك إنه يتوب
جرب مرة تكنس شارع
وانسى جنابك تلبس بوت
ازرع قلب غيطانك طوب
ازرع جوا الصحرا قلوب
واقرا ف قلب الضلمة كتابك
يمكن تفهم إيه مكتوب
وابنى تحت الكنبة مساكن
والبس بدل الكاجوال توب
إياك مرة تزرع ورد !!
أحسن تنسى
وتزرع بدل الورد حروب
ولا تحاول تشرب بدل الدم
عصير خروب..
جرب مرة تساعد واد موهوب
وانسى خيال بدل الخطوة
يشق دروب
عاشق قلبى للبشرية
ونفسى أتوب..!!
جرب مرة
تبقى حياتك بالمقلوب