الرئيس السيسي يشهد افتتاح مشروعات جديدة ويؤكد: البنوك ستغطى المطلوب بالدولار لصالح الاعتمادات خلال 4 أيام.. صندوق قناة السويس مراقب من أجهزة الدولة.. ولازم القناة يكون عندها أموال سايلة تقدر بالمليارات

** الرئيس السيسي: الانتهاء من مشكلة المستلزمات بالموانئ خلال أسبوعين
** الرئيس السيسي: عندنا إنتاج ذاتى محلى لبعض المنتجات اللى ما نقدرش نستغنى عنها
** الرئيس السيسي: ربنا وفقنا ننفذ التزام دخول البضائع بمليارات الدولارات
** الرئيس السيسي: الدولة تبذل جهدا كبيرا للحفاظ على استقرار الأسعار وما تزيدش
** الرئيس السيسي يرد على أزمة الصندوق الاستثمارى لقناة السويس: ده حلم الناس
** الرئيس السيسي: والله العظيم أنا صادق معاكم.. والناس عايزة تعرف وتطمئن
** الرئيس السيسي: بنخاطب الرأى العام بالحقائق والمشروعات توفر مليارات للاقتصاد القومى
** الرئيس السيسي: "بنستورد صودا آش ب300 مليون دولار وما فيش وقت نأجله"
قال الرئيس عبدالفتاح السيسي، إن البنوك ستغطي المطلوب بالدولار لصالح الاعتمادات خلال مدة 3 أو 4 أيام.
وأضاف الرئيس السيسي، خلال افتتاح مصنعى إنتاج الغازات الطبية والصناعية ومحطة توليد الطاقة الثلاثية بمجمع الصناعات الكيماوية بأبو رواش بمحافظة الجيزة،: كان فيه نقاش مع وزير البترول على موضوع الصودا آش لما كانوا بيكلموا المستثمرين علشان بنستوردها من بره، وبدل ما اشترى المنتج من بره أعمله عندي، والعمالة مصرية واشتريه بالجنيه المصري بدل الدولار، وكل ما طلع منتجات، وبقول كل ما هننتج حاجات بنجيبها من بره يبقا هنخفف العبء على الدولار.
وأكد الرئيس عبد الفتاح السيسى على أهمية الانتهاء سريعا من الإفراج عن البضائع بالموانئ، قائلا: "موضوع المستلزمات وأرجو أن نطلق هذا الأمر بتغطية إعلامية والناس تشوف حجم المواد اللى هتخرج من الموانئ خلال الأسبوعين اللى جايين دول، علشان يبقا الحمد لله أنهينا المشكلة دي".
وتحدث الرئيس عبد الفتاح السيسي، مع الدكتور مصطفي مدبولي، رئيس الوزراء، حول الإفراج عن البضائع والمنتجات الموجودة في الموانئ، قائلا: "ارجو وإحنا بنعلن ده.. إننا نكون موجودين وقت إطلاق القوافل والإفراج عنها، ونقول بيانات أكثر للناس".
وأضاف الرئيس السيسي:"عاوز اطمنهم وإحنا لما قولنا ده.. ربنا سبحانه وتعالي وفقنا ننفذ الالتزام.. بنتكلم عن مليارات كتير من الدولارات.. الناس ماسكه شوية في الدولار.. لا بأس.. وإحنا معانا دولارات برضه".
وقال الرئيس السيسي: "بنتكلم عن صناعات محددة هذه الصناعات ما عندناش رفاهية إن إحنا نخاطر بيها، ما نقدرش نخاطر بيها، مش بس علشان بتستورد من بره، لا أنت عندك استقرار في إنتاجها عندك".
وأوضح الرئيس السيسي: "إنتاج فوق أكسيد الهيدروجين إنتاجه فوق 50%، ولما بنتعامل مع الموردين نفاجئ بأن الأرقام بقت مختلفة فوق طبعا، وبالتالي مصنع فوق أكسيد الهدروجين محتاجين نتحرك علشان الفجوة متبقاش 50 % .
وتابع الرئيس: مصنع الأسمدة الأزوتية كان المفروض يبقا المفروض في شهر 12 مع ال 6 مصانع بتوع السخنة، لكن نتيجة الظروف الدولية اتأخرت شوية ، لكن في شهر أو اتنين أو تلاتة بيدخل 700 ألف طن أسمدة ازوتية يجابه التطور اللى إحنا بنعمله بنتكلم و 2 أو 3 ملايين فدان خلال سنتين، ولو بطلع الأسمدة اللى بتكفيني وأصدر منها شايفين كويس قوي، وبقول لإخوانا المزارعين لو الأسعار بتاعت الغاز اللى داخل في صناعة الأسمدة التمن هيبقا غير كده خالص، بس الكلام ده حريصين على إن إحنا نعمل استقرار في مدخلات الزراعة، وبالتالي الأسعار ما تزيدش، لو وزير البترول قالى مش هقدر أدي مصانع الأسمدة بالتمن اللى بياخدوا دلوقتي وعاوز ازود الرقم ضعفين، طيب مين بيستحمل ده؟ الطن أبو 6 آلاف يبقا 12 أو 13 وبالتالي المزارع يزود الأسعار والمواطن يلاقي حاجته بأسعار غالية جدا وإحنا بنحاول مع بعضنا".
تحدث الرئيس عبد الفتاح السيسي، مع اللواء دكتور إيهاب عبد السميع، رئيس مجلس إدارة شركة النصر للكيماويات الوسيطة، حول مصانع الكلور التي تنفذها الشركة، قائلا: "انتوا شغالين فى الكلور وفي المصانع ودى هتخلص امتي؟"، ليرد عليه اللواء إيهاب قائلا: "في أبريل 2024".
وأضاف الرئيس السيسي:"أنا براجع البيانات.. وبقول لما اتحركنا في موضوع بعض المواد الخاصة والاستراتيجية اللى من ضمنها الكلور والغازات الطبية.. ولما اتكلمنا في الغازات الطبية.. إنتاجنا قبل كده يكفي.. وجاءت أزمة كورونا وقولنا لازم يكون عندنا كميات تكفي التطور خلال السنوات الجاية".
وتابع الرئيس السيسي: "بنقول ده في ظل التطورات الموجودة في العالم.. مفيش استقرار في موضوع التعاقدات العالمية.. التكلفة زيادة والتوقيتات مختلفة.. والحاجات الاستراتيجية اللى ما نقدرش نستغني عنها سواء كان بالاستيراد نتيجة سلاسل الإمداد خلال الثلاث سنوات الماضية.. سنتين فى كورونا وسنة الحرب الروسية الأوكرانية.. ما أمكن أنه عندنا إنتاج ذاتي محلي لبعض الموضوعات اللى ما نقدرش نستغني عنه".
وتحدث الرئيس عبد الفتاح السيسي، عن جهود الدولة في الحفاظ على الأسعار، قائلا: "بقول للمثقفين والإعلاميين وغيرهم.. كل كلمة ممكن تبقي عنوان كبير.. انتوا فاهمين أن المنتجات الزراعية أو المواد الغذائية تزيد مرتين وثلاثة.. من يستحمل ده.. والبلد كيف تواجه الحالة دي.. وهي ماسكه ما أمكن أن الأسعار ما تزيدش.
وأكد الرئيس عبد الفتاح السيسي، على ضرورة تكاتف الجميع خلال الفترة الحالية، متابعا: "بقول الكلام ده علشان كلنا نتكاتف.. حد يقول ده فرصة نعلي الأسعار وما فيش دولار.. الوقت ده يبرز فيه حرصنا على الناس.. وما نغليش الحاجة على الناس.. بنتكلم في أكل وشرب وحاجات أخري.. وبنعمل مصنع يوفر 700 ألف طن إنتاج مصري نلبي مطالب السوق ولو فيه فرصة للتصدير للخارج.
أضاف الرئيس السيسي، خلال كلمته في افتتاح مشروعات جديدة في مجمع الصناعات الكيماوية: "الصودا آش مسار ولما بقولكم فيه أمور غير مسار المناقصة الفنية متكاملة.. لكن المسار بتاع التعاقد.. وزير البترول ونشوف القطاع الخاص والبنوك تمول.. ومش عندنا وقت لتأجيل المصنع ده سنة أو تنين لحد ما مصادر التمويل.. لا.. بستورد ب 300 مليون دولار.. صودا آش.. وببيعه بالجنيه.. بعملة البلد.. بنشغل ناس ووفر الكمية والدولار.. والناتج المحلي يزيد".
تناول الرئيس عبد الفتاح السيسي، الأزمة المثارة حول قناة السويس في الأيام الأخيرة، وشائعات بيع المجرى الملاحي.
وقال الرئيس السيسي:"مش انتوا من كام يوم حصلت موجة كبيرة جدا على الصندوق الاستثماري بتاع هيئة قناة السويس، بالله العظيم ده حلم الناس.. لازم تعرف الحكاية، لما جه الفريق أسامة في 2019 بقوله قولي عندك أموال إيه؟ قالي أنا ماعنديش حاجة.. قلتله يعني أنت لما تيجي تعمل مشروع تطور بيه قناة السويس هتعمل إيه؟ قال هروح لوزارة المالية.. ولا بأس لأن ده النظام، قلتله في البلاد اللي زي حالاتنا اللي ظروفه الاقتصادية ما تستحملش، لازم يكون فيه أوعية على جنب والكلام ده عملته في وزارة الصحة".
قال الرئيس عبدالفتاح السيسي، إن أرباح قناة السويس منذ عام 1975 بلغت نحو 220 مليار دولار، معقبا: "بتكلم عن الافتتاح الجديد سنة 75 قناة السويس جابت 220 مليار دولار، لو حد كان شال 10 % من الرقم ه وحطه في صندوق، كان زمان النهاردة بنتكلم معايا 50 مليار دولار.. لكن يدخل يعمل تطوير في القناة ما عملوش.. يدخل مع حد مشروعات ما عملوش..عاوز يعمل خدمة مجتمعية متقدمة لمدن القناة ما فيش.. قلتله لا ما ينفعش الكلام ده".
وأضاف الرئيس السيسي: جه الدكتور معيط والدكتور مصطفى .. لا يا أفندم والنبى إرحمنا والفلوس اللى هتخصمها علشان الصندوق مش هنقدر، قلتله يا دكتور مصطفى افتكر لما جت أنت والمهندس شريف الفلوس بتاعتك ما تتحولش وقلت خليها عندك في وعاء، وكنت متحمس للفكرة، وجه المهندس شريف ووزير المالية قلتلهم اسمعوا كلامي وهتشوفوا، دلوقتي وزارة الإسكان بقت بتشتغل ب 8 مليارات جنيه في الشهر.. وزارة الإسكان وهيئة المجتمعات بتشتغل ب 8 مليارات جنيه في الشهر، بلد عايزة مليون وحدة سكنية في السنة يبقا الوزارة دي تعملها 400 ألف والقطاع الخاص يعمل شوية كمان معاه علشان ميبقاش اللى إحنا شايفينه في العشوائيات".
وتابع الرئيس السيسي،:" أمال الصندوق دخل البرلمان ليه؟.. علشان يديله حصانة برلمانية ما حدش يقدر ياخد منه ولا يتصرف فيه طبقا للمعايير اللى تم التصديق عليه بيها والقواعد اللى اتحطت وأجهزة الدولة الرقابية تفتش عليه وجهة سيادية مسؤولة عليه برضه وكل حاجة.
قال الرئيس عبدالفتاح السيسي، إن دخل قناة السويس 70 مليارا، .. ناس تقول طيب فين إحنا؟ استنوا عليا!!.. الدولة غلبانة قوى، أنا أسف إن أقول كده، إذا ما كنش نحرم نفسنا ونعمل مش هتتعمل..والله العظيم أنا صادق معاكم، وبقول كل كلمة وربنا سبحانه وتعالى شاهد عليا، وربنا وحده اللى هايحاسبني ويكون ليا أجر ورضا على اللى إحنا بنعمله".
أضاف الرئيس السيسي: مش هننفع نمشى بالطريقة اللى إحنا بنعملها .. لازم يكون فيه أوعية موجودة وهي بتتعمل صعبة شوية، ما هو الكلام ده بيتاخد من وزارة المالية، لما بتخش الوزارة ما فيش أمل لازم تخلص، لكن أخليها في الصندوق هو بيقعد يفرك في المالية والحكومة".
تابع الرئيس: "لو هيئة قناة السويس عاوزة تخش في مشاريع تمويل أرباحها 500 مليون في الشهر، طيب السنة اللى جاية ممكن تعمل مليار في الشهر والسنة اللى بعدها يبقا مليارين واللى بعدها يبقا 3 مليار في السنة، مش أنتم قولتولي في رقابتك؟ .. وأنا والله العظيم بحاول أعمل على ما قد ما ربنا يقدرني".
وأضاف الرئيس السيسي: "الناس عاوزة تعرف وتطمن أنه ما يكونش فيه حاجة غلط أو هاتبقى غلط".. مش هنقول أن كل من اتكلم أنه مغرض .. وفيه ناس خايفة.. والخوف بقا سمة موجودة عندنا.. ومش ما صدقين أن إحنا ممكن نعمل، وإن شاء الله هنعمل وهنعمل ".
تحدث الرئيس عبد الفتاح السيسي، عن طرح شركة قناة السويس في البورصة، قائلا: "قولنا طرح شركة قناة السويس في بورصة للمصريين فقط.. علشان كلها من المصريين فقط وتشتري الأسهم دي.. فيه فرق أن أقول دخلها كده وأنه عندها أموال سايلة حوالي 200 -300 مليار.. ده حاجة تانية.. ده مستوي أكثر من الموجود".
أضاف الرئيس السيسي:"مش بتقولوا فيه مشاريع تتعمل قد تؤثر على دخل قناة السويس في يوم من الأيام.. ده يخليني اعمل ده.. التأثير قد إيه.. ده كلام نظري خالص بس برد عليه.. يبقي عندي دخل.. وأعمل مشاريع تانية وشركات تانية.. بالفلوس والتدفق المالي الشهري ادخل في مشروعات مثلا 500 مليون في الشهر.. أو أكثر من كده.. خلي بالكم".
تحدث الرئيس عبد الفتاح السيسي، عن جهود الدولة في دعم إنشاء المصانع من أجل تقليل الاستيراد، قائلا: "المسار اللى بنتكلم فيه لرجال الأعمال.. لما قولت الرخصة الذهبية كان اوفر للوقت.. والكلام للبنوك ما فيش وقت قدام القروض ومستلزمات القرض في موضوع أكيد نجاحه.. مشروع الصودا آش ناجح لأنك تستورد ب 300 مليون دولار.. لما توفر المبلغ ده لصالح الاقتصاد القومي".
أضاف الرئيس السيسي: "ما قدرشي أقول إنك ما تطلبشي دراسات جدوي.. وزارة التجارة والصناعة تقدر تقول للبنك على الأقل تقدم إخطار للبنك أنه نستورد منه كام طن بقيمة كده.. والمصنع ده لما يتعمل هيشيل 50 % من المطلوب أو الكمية كلها".
وتابع الرئيس السيسي: "فيه موضوعات ما قدرشي استحمل سنة واثنين وثلاثة.. ونتعاقد مع الشركات والوقت له تمن.. تتقدر تتعاقد أول السنة 2023 والافتتاح في 2024 والصودا اش.. ده بيكلفنا 300 مليون دولار.. لكل الناس بتكلم دايما وما خبتش عنكم حاجة.. وفيه كلام والله المفروض طبقا للمعايير السياسة والكلام ده تطرح للهواء.. في إطار مخاطبة الرأي العام والحقائق".
وفى نهاية كلمته، وجه الرئيس عبدالفتاح السيسي، الشكر لجهاز الخدمة الوطنية والعاملين في شركة الكيماويات الوسيطة، متمنيا لهم كل التوفيق".
قال الرئيس السيسي خلال افتتاح مصنعى إنتاج الغازات الطبية والصناعية ومحطة توليد الطاقة الثلاثية بمجمع الصناعات الكيماوية بأبو رواش بمحافظة الجيزة:" بقولهم محتاجين جهدكم ونطلع منتجاتنا اللى إحنا محتاجينها في مصر ما أمكن زى الأسمدة والكلور .. إحنا بننمو في موضوع محطات المعالجة واتصور إن الطلب على الكلور يتنامى ..وأيضا فيما يخص المستشفيات محتاجين نمدها بالأكجسين لما نستكمل خطط التأمين الصحي.. محتاجين النمو المحتمل ونكون مستعدين دايما نجابه وخلى بالكم من الإجراءات الأمنية وخلوا بالكم من نفسكم".