باكلم صاحبى إياه ع الفيس بوك باقوله.. عاجبك كده؟ هه..عاجبك الشباب اللى بيحرق ويكسر فى البلد مالهم همه بوزارة الداخلية؟ قالي أنت عبيط؟ همه عارفين أصلا دى إيه؟ همه اتجننوا أما أصحابهم ماتوا بمؤامرة فراحوا يطبشوا فى أى حد لابس أسود وحاطط خوذة.. وعندهم حق بصراحة قلتله بس يجب أن يحترموا الديمقراطية ويتبعوا الشرعية ويجب أن ولن وكى ولام التعليل؟؟؟ قالى ماليش فيه.. باقولك إيه يا عم ماجد الشباب تعبان.. والكدب بان.. والعفريت لما بيطلع مايهديهوش ملك الجان بصراحه أنا خفت منه شكله ممكن يعملى عمل سفلى.. قلت اهدى اللعب معاه.. قلتله طب إيه الحل من وجهة نظرك قالى شوف.. هيه علامة ظهرت من علامات يوم البركان.. قلتله إيه هيه يا مان؟ قالى.. إن نايب يدن فى البرلمان قلتله وإيه يعنى ده تجاوز عادى يعنى قالى لا دى ليها مدلول.. قلتله إيه مدلولها؟ قالى إن البرلمان ده مش حاسس بينا ومشغول باللى كان زمان.. ومش باصص للحياة الآن قلتله طب مقلتليش نعمل إيه؟ قالى قولى بصراحة.. أنت تعرف تتكلم مع حد وأنت جعان؟ قلتله لا طبعا قالى تعرف تتفاهم وأنت عليك دين؟ قلتله لا حابقى مكتئب وعاوز إولع فى نفسى قالى تمام.. الحل هنا.. البرلمان أبو أدان.. يعمل راتب شهرى لكن إنسان عاطل أو بلطجى.. 600 جنيه شهرى.. ويدى لكل موظف شركته قفلت بسبب الثورة نص مرتبه.. ساعتها بس ممكن نتكلم مع الشباب ونتناقش فى الحريات والتهدئة وعيب يا ولاد بلاش الداخلية خشوا شويه ع الخارجية وكده.. مش ممكن تتناقش مع حد ميت.. الناس ميته من الجوع بقالهم سنة وأنت بتقولى تهدئة.. اديهم نفس أكسجين بدل نفس الغاز المسيل للدموع وأتناقش بقه معاهم فى الليبرالية والإخوانية، لكن الآن مافيش عندهم غير حزب واحد هو حزب الهستريا اللاارديه الانفعالية الهدامة الرجعية.. وادينى سندوتش ملوخية.