الرئيس السيسى يطمئن المصريين: واقفون على أرض صلبة.. والأزمة ستنتهى ومفيش بلد هتتقدم وتعبر مشاكلها إلا بالأمن والاستقرار.. ويؤكد: هنعبر كل المصاعب.. ومعندناش تحديات كبيرة زى بلاد أخرى الدنيا مش بتفضل على حالها

* الرئيس السيسي: الدنيا مش بتفضل على حالها وربنا معانا
* الرئيس السيسي: الأمور الصعبة نتغلب عليها بفضل الله وإرادة الانسان
* الرئيس السيسى يؤكد: الأمن والاستقرار موجودين فى مصر

وجه الرئيس عبدالفتاح السيسى، التحية والتقدير والاحترام لأسر طلبة الكليات والمعاهد العسكرية، مقدما التهنئة لهم قائلا: "ألف مبروك".

كما وجه الرئيس السيسى التحية والتهنئة للخريجين من الضباط، متابعا: "أتمنى لهم كل التوفيق فى حياتهم، يعنى لسه أول خطوة النهاردة فى حياة الضابط المتخرج وده الحقيقة يمثل خطوة مهمة قوى، وخطوة رائعة وعظيمة فى حياتك، وحياة كل الخريجين أن شاء الله، سواء الكليات العسكرية أو حتى الكليات المدنية".

تابع الرئيس: "خلينى أقول لكم، فى الدنيا الموجودين فيها الأمور دايما بتبقا متغيرة، ولكن إرادة الإنسان، وقبل منها بدعم ربنا سبحانه وتعالى ومشيئته كل الأمور حتى الصعبة يتم التغلب عليها".

أكد الرئيس عبدالفتاح السيسى، أنه كان على يقين فى انتصار مصر على حربها ضد الإرهاب، قائلا: "خلينى أفكركم من سنين 2013 و2014 وكان الإرهاب بيضرب فى بلدنا، وكنتم بتشوفوا شهدائنا ومصابينا".


أضاف الرئيس السيسى خلال حفل تخرج دفعة جديدة من طلبة الكليات والمعاهد العسكرية: "كنت بتقولوا الدنيا دى هتفضل كده ولا إيه؟، كنت متأكد بفضل الله هنعبر زى كتير من الأزمات ما تعبر، واللى يقرأ التاريخ هيشوف كده كتير، وده اللى يهمنى أقولكم كده دلوقتى، وبقول لكل المصريين.. الدنيا مش بتفضل على حالها، ودايما ربنا إيده الطيبة موجودة معانا كلنا ومع الدنيا كلها وإلا مكانتش أبدا استمرت".

وأكد الرئيس عبدالفتاح السيسى، أن مصر ستعبر الأزمة الحالية، قائلا: "المرحلة دى أن شاء الله هنعبرها بخير وسلام، وأتصور إننا متابعين كل المصاعب إللى موجودة مش بلدنا بس، ولكن فى الدنيا كلها، ولكن زى ما قلت قبل كده أزمة كورونا مرت بسلام بآثارها، لكن عبرت بفضل الله سبحانه وتعالى، ونقدر نقول أن آثارها يمكن التعايش معاها".

أضاف الرئيس السيسى: "برضه الأزمة اللى إحنا موجودين فيها دلوقتى حتى لو كان ليها آثار صعبة علينا دلوقتى، لكن أزمة وهتنتهى بفضل الله سبحانه وتعالى، واللى هتبقا الأوطان والبلاد والاستقرار والأمان والسلام، لأن بالمناسبة مفيش بلد هتتقدم فى الدنيا وتعبر مشاكلها إلا بالأمن والاستقرار".

أشاد الرئيس عبدالفتاح السيسى، بجهود المواطنين والقوات المسلحة والشرطة، فى الحفاظ على الدولة قائلا: "واتصور واتكلمت فى المسالة دى كثيرا قبل كده، وقلتلكم المشاهد اللى بنشوفها حوالينا بتأكد حاجة واحدة بس أن الجهد اللى بتبذل من كل مواطن مش الجيش والشرطة للحفاظ على الدولة جهد مشكور وبيخلى ال 104 ملايين وأكتر موجودين على أرض مصر عايشين وعندهم أمل فى بكرة".

تابع الرئيس: "كل المصاعب بفضل الله سبحانه وتعالى هنعبرها واحنا بخير وفى خير، وأقدر أقول أن احنا واقفين برضه على أرض صلبة معندناش تحديات كبيرة قوى زى بلاد أخرى ليه؟ علشان الأمن والاستقرار اللى موجود فى مصر".

أكد الرئيس عبدالفتاح السيسى، أن الأمور دايما بتبقى متغيرة ولكن إرادة الإنسان وقبل منها دعم ربنا ومشيئته كل الأمور حتى الصعبة يتم التغلب عليها"..لو كنتم شوفتم من سنتين كلنا كنا واقفين ولابسين علشان كورونا والناس كانت متصورة أنه اخر الدينا.. لا مش اخر الدنيا ولا حاجة وانتهت بفضل الله سبحانه وتعالى".

فى نهاية كلمته قال الرئيس السيسي: "مش هنسا أقول للظباط الجدد وقلت الكلام ده فى أكاديمية الشرطة خلوا بالكم انتوا دوركم كبير قوى، ولو شوفتوا حتى فى حربنا ضد الارهاب كان فيه شهداء ومصابين، دايما حريصين أن احنا نذكرهم ونأكد أن إحنا مش بس الدولة والحكومة كل إنسان مصرى يفتكر كويس قوى أن فيه أسرة قدمت إبنها.. الإبن ده بقا شهيد.. بعد ما ربته شاب جميل وقد الدنيا.. قدمته لبلدنا وقدم روحه لها علشان نعيش بالشكل اللى احنا فيه، لأن ده دور الجيش إنه يحمى ويصون ويضحى علشان البلد دى تبقا ثابتة ومستقرة وآمنة أن شاء الله".