الرئيس السيسى خلال حفل تخرج دفعة جديدة من كلية الشرطة: "كل الاحترام والمحبة والتقدير لأسر الشهداء.. ويؤكد: علينا العمل أكثر للوفاء لهذه الدماء.. والدولة المصرية تنفذ التطوير فى كافة القطاعات بدون ضوضاء.. فيديو

أكد الرئيس عبد الفتاح السيسي، أن التضحيات التى قدمها الشهداء كبيرة من أجل أمان واستقرار ومستقبل الدولة المصرية، قائلا: "اسمحوا لى أن أرحب بكل السادة الحضور.. الأسر اللى موجودة.. برحب بيكم.. أهلا وسهلا.. واسمحوا أن أهنئكم بتخرج أبنائكم وبنتاكم.. ألف ألف مبروك".


وأضاف الرئيس السيسي، خلال كلمته فى حفل تخرج دفعة جديدة من كلية الشرطة: "هبدأ كلمتى غير المخططة بكلمة لأسر الشهداء الأول.. كلامى ليهم كله احترام ومحبة.. كل احترام ومحبة.. احترام للعطاء اللى اتقدم لأجل خاطر بلدنا وشعبنا.. وعايز أقول لكل الأسر اللى موجودة معانا.. اوعى تفتكروا.. والكلام ده قولته قبل كده وبأكده.. الدماء اللى قدمت والأرواح اللى راحت عند ربها.. تمن بسيط.. ده فى رقبتنا احنا فى شعب مصر كله.. وعند ربنا سبحانه وتعالي"، متابعا: "كنتم سبب فى أن ابنائكم وأزواجكم يقدموا التضحية من أجل مصر.. بتكلم عن كل الشهداء من كل القطاعات.. هما السبب في اللى احنا فيه دلوقتي.



وتابع الرئيس السيسي: "اللى انتوا شايفينو ده.. ده تمن لأرواح أبناء مصر.. تمن غالى أوي.. لكن أن يكون التمن ده حماية وتأمين واستقرار أكثر من 100 مليون مش بس فى امانهم وسلامهم.. ومستقبلهم.. ولو البلد كانت راحت مكنشى هيكون فيه مستقبل لحد.. مش هقول مش تزعلوا ولا تتأملوا.. احنا معاكم.. وقبلنا.. ربنا موجود معاكم.. خلى بالكم.. الشهيد عند ربنا حاجة جميلة أوى.

وشدد الرئيس عبد الفتاح السيسي، على مكانة الشهيد عند الله قائلا: "والله الشهيد عند ربنا حاجة جميلة اوى.. ربنا اللى بيعطيه وبيعوض عليه.. وعليكم.. هو ربنا سبحانه وتعالي.. علشان مش ننسى.. الحمد لله رب العالمين.. الأمور اتحسنت كتير أوى بفضل الله سبحانه وتعالي.

وأكمل الرئيس السيسي: "كل التهديدات والإرهاب زالت بفضل الله وبفضل أبناء مصر من الشرطة والجيش وكل قطاعات الدولة إحنا فى مكان كويس أوى.. ولسه".. طيب مطلوب مننا أكثر العمل.. نعمل أكثر من كده.. نقدم الوفاء لهذه الدماء.. مرة ثانية كل التحية والمحبة والاحترام والتقدير ليكم وأرواح الشهداء والمصابين والأسر.. وربنا يجزيكم خير الجزاء.. ولن ننساكم ابدا.. لن ننساكم ابدا.. إن شاء الله".


وقال الرئيس السيسي: "يمكن رسالتى مختصرة لأبناء الخريجين.. نهنئكم وبقولهم ألف مبروك.. ودى مرحلة جديدة من حياتكم.. مصر أمانة فى رقبتنا كلنا.. امانها وسلامها واستقرارها وتقدمها أمانة فى رقابتنا كلنا.. المسئولية على عاتق وزارة الداخلية كبيرة أوى.. لو قابلتنا مشكلة نسأل نقول فين الشرطة وحتى لما الأسعار تغلى نقول فين الشرطة وفين الرقابة.. دوركم مشهود من الناس كلها.. ومصر كلها تقدر هذا الدور.. طالما يحترم إنسانية المواطنين وإنفاذ القانون".

وتابع الرئيس السيسي: ""دايما عايزين واحنا بنتعامل مع المواطنين دائما منتبهين اننا موجودين فى الشارع ونتعامل مع تحديات كتيرة.. فيه ممارسات واللى ماشى صح خلاص.. المشكلة اللى معاه أى مخالفة .. ترفق بيه وتعمله من خلال أدائك الراقى من خلال القدوة والممارسة.. اتمنى لكم التوفيق.. شعاركم.. علم واخلاق وواجب.. ولم ينتهى العلم بالتخرج فقط.. احرصوا على التطور".

ووجه الرئيس السيسى رسالة للمصريين: "اسمحوا لى أن اقول لكل المصريين.. اوعوا تتصورا فيه قطاع من قطاعات الدولة لم نعمل على تطويره.. بفضل الله نعمل على تطوير كافة القطاعات.. بنشتغل من غير ضوضاء.. ومش بنقول هنعمل هيكلة وإصلاح.. بنقوم بالدور ده.. عملية التطوير مستمرة لا تنتهى بمرحلة أو فترة زمنية محددة.. الدنيا بتغيير.. ولازم احنا كمان نتطور.. التطوير لكل قطاعات الدولة بشكل هادئ والدولة بتحررك فى تطوير قدراتها وأدائها ولكن من غير ضوضاء".

وقال الرئيس السيسى فى نهاية كلمته: "واجبكم خالى بالكم تجاه بلدكم.. أمن وامان مصر امانة فى رقابتنا ورقابتكم.. اتمنى لكم كل التوفيق.. الف مبروك .. خلى بالكم من نفسكم.. واحرصوا على العمل الطيب والأداء المتميز.. اللى منتظرينه منكم.. الف مبروك".