صباح الخير يا مصر

من بعد طول السكات
ولادك حققوا النصر.. على الظلم اللى فات
وبأعداد ملهاش حصر.. خرجوا شباب وبنات
وقالوا إحنا سند مصر.. م النهاردة ف كل الأوقات
صباح الخير يا مصر.. يا بلدى يا حرة
ولادك حققوا النصر.. على فترة حكم مُرة
كفايانا خوف وسُكات.. عشان اللى جاى قدام
يبقى أحسن م اللى فات.. ونطلع سوا لقدام
صباح الخير يا شباب.. يا اللى طلبتوا التغيير
وجمّعتوا الأحباب.. سوا ف ميدان التحرير
ووقفتوا وقفة رجال.. ف ثورة الحرية
وعملتوا أحلى كرنفال.. لأحلى انتفاضة شعبية
وخليتوا قلوبنا ملهوفة.. ع التغيير والحرية
ورجّعتوا بلدنا المخطوفة.. من أيد الحرامية
صباح الخير يا مصر.. والناس رافعة العلم
وبتحتفل بالنصر.. وبتدعى ع اللى ظلم
ومصر لابسة جديد.. ف كل حتة ف أراضيها
وبتحتفل بالعيد.. واللى عملوه شبابها راضيها
يا اللى ظلمت ولادها.. ما عادلكش مكان فيها
أعمالك جه وقت حصادها.. واللى بيزرع حاجة بيجنيها