حرية.. حرية

عدت علينا أيام وأيام والخوف ركبنا ومدلدل رجليه
وكل واحد قاعد يحسبها ازاى يكمل ثلاثين يوم عليه
واحد قال الثورة هى اللى خلتنا ندور على واحد جنيه
والشغل خلاص راح منا وابتدينا نسأل هوفى إيه
رد التانى وقال الدنيا هى هى والثورة جاية جاية
بلاش نلزق لها كل حاجة ولازم نصبر عليها شوية
ده لسانه عاش حياته يتهته والنهاردة بيتكلم شوية
وبكره لازم يتكلم ويتكلم ويقول للدنيا حرية حرية
إمبارح كنا بنشكى ونقول آه ومعانا سكينة ورية
والنهارده معانا ناس بتمشى حياتنا ثانيه بثانيه
وماحدش فينا عارف ولا فاهم بيقولوا لينا إيه
بعد ما راحو ولادنا وما خدناش من حد الدية
ده هو ,وهمه مشوا وسابو أجمل وأحلى هديه
وتانى وثالث بنتحاسب لما نقول حريه حريه
اتقسمنا كتير وكتير ومحدش عارف إيه النيه
وسمعنا كلام بيقول معايا عيشتكوا هتبقى هنية
تتغير فيها حياتكوا والواحد عندى يساوى ميه
وكأن مصر دى كعكة والكل بياكل منها حتة
لا والله مصر هتفضل فى قلبى أولى وتانية
وصوت الحق مش هيموت وينادى حرية حريةْ