اسمعوا آخرالأنباء مسئول بيقول دا وباء والاسم العلمى بتاعه أنفلونزا الرؤساء فيه فيرس جن اتحوّر يجى ع الرؤساء ويشوّر ع اللى بيسرق ويزوّر واللى معندوش أخلاق فيرس بيجيب م الآخر يدخل ع الحاكم ساخر ويقول له بذوق اتّاخر قبل ماتقلب بخناق اتّاخر يبقى بيفهم اتأخر الله أعلم المخفى ح يلحق يندم واللا الفيرس سبّاق ظهر الفيرس فى يناير متعكر دمه وفاير كان خامل وصبح ثاير واتمرد ع الترياق حكام وخيبتهم مايلة أكلوها سليمة وسايلة أولهم كان جوز ليلى وتانيهم كان أبوعلاء جوز ليلى فهم متأخر بوعلاء م الخضة اتبخر والفيرس كان متسخر لا مجاملة ولا استثناء دخل الفيرس ع التالت ودا كان مختل وفالت من عقله الحكمة اتشالت وأهو راح وكأنه ماجاء والرابع سوّف ماطل وخلط بالحق الباطل وآخرها ح يقعد عاطل وح يلجأ للأعداء وخامسهم لأ مش طيب دا حلف بأبوه مايسيب إنما ح يطب قريب والمفتى خد الأوراق ويافيرس أجرى شوية فيه دوله عزيزة علىّ جار اللى حاكمها وهى أصغر من حى بولاق أرجوك مش عايزه يعدى وديه مطرح ماتودى وان كنت يافيرس مادى تبقى الثورات أرزاق