أهانها المرض فأعزها الله بمعجزة.. حب بعد ال 70 بين العبد الراضى الشقيان والرب الكريم

"من رحم المحنة تكون المنحة"، هذه هي حكاية الست "أم أحمد" ،أو مثلما أطلق عليها أهل منطقتها ب"البركة"، حكمت الحياة عليها وهى في سن الكبر بالعجز، توفى زوجها بعد قصة حب استمرت 40 عاما، وتركها وحيدة تصارع المرض، وتقاتل في الحياة من أجل البقاء.. كفاحها رسم طرق مليئة بالحب بين الرب والعبد الراضى بقضاء الله وقدره.
وفى حلقة جديدة من برنامج فتحى شو، تقديم محمد فتحى عبد الغفار، التقينا بالبركة الست أم احمد لنعرض قصتها المؤثرة التي تلهم من يشاهدها بكم الرضا والقناعة وحب الله سبحانه وتعالى وثقتها فيه .
وتقول "أم أحمد"، "ضهرى اتكسر بعد ما مات جوزى ومات بحزنه بسببى ومات ومشوفتوش ولو كلمتك بضحك وبعيط في نفس الوقت هي ديه سنة الحياة يا ابنى، انا بموت وبنزل الشغل مبحبش قعدة البيت انا من ساعة ما ربنا خلقنى وانا بحب الشغل كنت مكافحة وكنت بصرف على امى واخواتى".
وتابعت، "كنت شغالة عند دكتورة وعلمتنى التمريض وسافرت السعودية اشتغلت هناك 5 سنين وحجيت بيت ربنا وانا هناك وكانت احلى حاجة عملتها في حياتى، لحد اما نزلت هنا وقابلت جوزى اللى انا اتجوزته وفتحنا المشروع ده وكبرناه شوية وبقالى 40 سنة واقفة فيه".
وأوضحت، "فتحنا المحل ووقفت مع جوزى وكنت بقف انا بالنهار وهو بيقف بالليل وخلفت منه 4 أولاد، ووقفت مع جوزى لحد اما وقفته على رجله لان ظروفه كانت على قده برضه، كنت ببيع السندوتش ب 35 قرش وكنت بعمل سندوتشات كبده وقوانص وجبنة وأنواع كتيرة، بيقولوا عليا البركة لانى بحب الناس كلها ولانى لو دخل عليا حد عايز سندوتش ومش معاه بديهوله بيعت مبعتش بقول يارب وربنا كارمنى وبقول الحمد لله، جوزى كان معودنى على انى أدى اللى مش معا ياكل وربنا بيبعتلى رزقى يا ابنى".
واردفت، "تعب وقعد المرض وحش يا ابنى، ولما قعد خليته ينزل برضه يقعد على كرسى قدام باب المحل علشان ميحسش بالتعب، كنت بطبق ال 50 جنيه اديهاله كل يوم وأقوله انت صاحب المحل انت البرنس لازم يا ابنى اقف معاه ده واجبى ولما جيت وقعت على رجلى ودخلت العمليات، ساعتها جوزى تعب وقال مين اللى هيراعينا ومات بزعله عليا، عايزة أقول لكل ست اقفى جنب جوزك وسيبك من الكلام اللى هو جديد علينا ربنا هيرضى عليكى ساعتها وهيراضيكى".
واستكملت، "تراكمت عليا الديون ووصلوا لحد 90 الف جنيه وربنا سبحانه وتعالى قدرنى انى اسدد الدين ده كله، كل شهر أطلع حاجة وبقيت اشتغل كل يوم من غير إجازة، الحالة بقت على قد الايد ومش طالبة غير الستر وانى اموت مستورة".