احرقوها!!!

البلد زى السفينة
يوم ما تغرق
كلنا نغرق معاها
يبقى شوفوا إيد أمينة
واحرقوا نيلها وسماها
أوعوا يوم ترحموها
وللا شفقة تاخدكوا بيها
مش كفاية النار عليها
مش كفاية تولعوها
الشطارة وبجسارة
تحرقوها
...................
أيوه لازم تحرقوها
وتحرقوا قلبى وراها
احرقوا كل اللى عِشقوا
ولا غنوا
ولا يوم دابوا ف هواها
احرقوا من قال فداها
احرقوا كل السنابل
فى ربوعها وف واديها
احرقوها
خلوا نارها لمنتهاها
.......................
احرقوا كل اللى فيها وريحونا
احرقوا التاريخ وكتبه واحرقونا
احرقوا المْجْمَعْ وعِلْمُه
بالحرايق خلدونا
احرقوا
الأرض اللى عشنا سنين عليها
وبين ايديها
بعد م الحكام باعونا
.........................
احرقوا سيارة عادى
احرقوا خيرات بلادى
احرقوا من بر شبرا للمعادلا
احرقوا الجيزة وسينا
واوصلوا بالنار لوادى
احرقوا أسوان كمان
والعريش واقفة تنادى
فى المحلة الحرايق جايه هَلَّه
طنطا تجرى تقول يا هادى
فين حرايقى وفين نصيبى
من دخانها أعلن حدادى
......................
احرقوا كل اللى يِطْفِى
واحرقوا اللى قلبه حارقه
واحرقوا الواقف قُصادي
واحرقوا من شهر عَدَّى
واحرقوا الشهر اللى جاى
احرقوها م الليلة دى
احرقوا كل الأسامى
واعلنوا موتى فى موتها
واحرقوا لحظة ميلادى
......................
احرقوا الجندى اللى حامى
واحرقوا بهية وهنادي
واحرقوا الفلاح فى أرضه
واحرقوا عُمال بلادى
واكتبوا وقولوا حرقنا
للكفاح ونكيد أعادى
واكدبوا للصبح حتى
واحرقوا قلبى وولادى
.......................
احرقوا الماضى اللى راح
واحرقوا الحاضر وبكرة
قولوا كانت خطة حلوة
قولوا كانت أحلى فكرة
قولوا بنحب التاريخ
والحرايق أغلى ذكرى
.......................
احرقوا جايز هتهدوا
أصلكوا عاشقين بهية
وبالحريقة تحموا مصر
وزى مصر تحموا مِية
واكتبوا لنا كلمة حلوة
وللا فيلم ومسرحية
وللا غنوة غنوا بيها
وكام قصيدة وتمثيلية
يظهر المحروق جبان
واللى حارق ميت ضحية
.......................
ومتخافوش عالعموم
كان مِسِيرها بِوِلْعَةْ تِوْلَعْ
عُمرها شايلة الهموم
ولما قامت فيها ثورة
قلنا تهدا .. مستحيل
تهدا ليه وتقول يا نوم
الهدوء يعنى الحريقة
وف دقيقة الثورة قامت
تبقى ثايرة كل يوم
الثورة يعنى أحرق وطن
ومطفهوش
يعيش وحيد من غير هدوم
واللى كان خايف لَتِطْفَى
واللى كان يحلم ببكرة
ارتاح خلاص
بكرة راح ملهوش لزوم
.....................
احرقوها بس شوفوا
واقروا فى التاريخ سنين
اللى حاولوا قبلكوا
حصدوا ايه الخسرانين
عاشت المحروسة وللا
جيش كبير م الحراقين
م التتار للفرنس والانجليز
يا ما حاولوا السفاحين
كلهم تاريخهم اسود
مصر بتاريخها لفين
أمة للتاريخ حضارة
بحر عُلَمَا وأصل دين
كلهم ماتوا وفِِنِيُوا
مصر للخلود تعيش
بإذن رب العالمين
بإذن رب العالمين