لجنة حكام "الفرصة": هناك شركات بدأت ناشئة والآن تخلق ملايين الوظائف حول العالم

قال باسل الحينى رئيس مصر القابضة للتأمين عن مسابقة الفرصة: لدينا استثمارات ضخمة جدا وسعدت جدا بالمساعدة فى البرنامج ولما دخلت فى الحلقات لقيت أن فرص الاستثمار مش مستبعدة، متابعا: من أول حلقة فى برنامج الفرصة بدأت اتفاعل مع الفكرة وبقيت بختار بين المتسابقين وعمل معايا حراك وطاقة إيجابية ومقابلاتهم كانت مثمرة.
وأضاف باسل الحينى، خلال برنامج كلمة أخيرة، المذاع على قناة on، والذى تقدمه الإعلامية لميس الحديدي: هقولك على مفاجآت تخص برنامج الفرصة، وبالتأكيد ممكن نستثمر فى شركة أو شركتين وقابلت أصحاب مشروع جونو لكى نعرفهم بالمستثمرين.
من جانبه قال محسن سرحان الرئيس التنفيذى لبنك الطعام: مشروع جونو فى برنامج الفرصة قريبين جدا لقلبى، وممكن يقلبوا الدنيا وربنا معاهم ومشاركتنا فى البرنامج حتمية لأننا نسعى لتحقيق الأمن الغذائى فى مصر.
وتابع الرئيس التنفيذى لبنك الطعام: فيه شركات بدأت ناشئة تخلق ملايين من الوظائف حول العالم، ولو برنامج الفرصة تكرر هيكون عندنا بيئة مناسبة لريادة الأعمال، مستطردا: إحنا وسيط مجتمعى زينا زى البنوك، وشغلنا إننا نتأكد أن الحاجة اللى بوصل للناس توصل بكفاءة أكتر، وده مش هيجى إلا باستخدام الأفكار الجديدة.
وتابع الرئيس التنفيذى لبنك الطعام: حلقة مشروع جونو فى الفرصة كان الاختيار سهل جدًا بالنسبة ليا وأصعب حلقة كانت حلقة مشروع كوليبرى، وإحنا بندعم الشركات اللى متأذيش المجتمع، والشركات دى هى اللى بتقدر تقف ضد الزمن.
وقال محسن سرحان الرئيس التنفيذى لبنك الطعام: الحلقة المقبلة من برنامج الفرصة لأن الزراعة فى صميم عملنا وتهدف إلى القضاء على الجوع، وننظر إلى زيادة إنتاجية المزارعين وزيادة دخلهم لأن ده يهم الأمن القومى الغذائى، والحلقة المقبلة من برنامج الفرصة تتعلق باستخدام التكنولوجيا فى الزراعة وكيفية تحسين حياة صغار المزارعين.
وقال الرئيس التنفيذى لبنك الطعام: الحلقة اللى جاية هندى المتسابقين حاجة مختلفة تماما وأحسن من الجوايز بكتير.. ولميس الحديدي: حلقة مثيرة جدا وفيها جوايز كتيرة.
فيما قالت دينا المفتى عضو لجنة تحكيم الفرصة: لازم يكون فيه أثر مجتمعى فى كل الشركات الكبيرة والصغيرة، وأيضا المتسابقين فى برنامج الفرصة، متابعة: باخد طاقة إيجابية كبيرة من البرنامج ويارب نشوف شركات كتير من رواد الأعمال فى الوطن العربى.
بدورها قالت راندا عبده عضو تحكيم برنامج الفرصة: أحلى حاجة فى الدنيا أن الواحد يفيد الناس، وحاسة إنى فى برنامج الفرصة بفيد الناس وباخد طاقة إيجابية وبشكرك.