قيادى سلفى: خطة لزيادة الدخل القومى من السياحة الحلال

تعجب الدكتور محمد فهيم القيادى السلفى بالدقهلية ممن يقول :"السلفيين لو مسكوا البلد هيقفلوا السياحة"، و قال:" أى راجل عاقل لما يكون عنده مصدر للدخل القومى ميقفلوش، وبعدين إحنا عندنا خطة لزيادة الدخل القومى من السياحة وعندنا أفكار تعمل سياحة دولية وعلاجية وتعليمية يكون لها بعد استراتيجى فلو كنا فتحنا جامعات واستوعبنا الطلبة الأفارقة فى جامعاتنا يتعلموا فيها كان اللى هيتعلم ويرجع بلده ويبقى محافظ أو وزير هيفتكر الجميل ده لمصر ولن يفكر فى عمل أزمة مياة عندنا".
جاء ذلك خلال مؤتمر حزب النور بمدينة نبروه بمحافظة الدقهلية مساء أمس بحضور المرشحين على قائمة الحزب ومئات المواطنين.
وأضاف فهيم :"نريد أن نطور السياحة وعندنا 3 ملايين يزورون الأهرام فى السنة منهم 2 مليون مواطن مصرى وفرنسا مثلا عندها قدره على صناعة السياحة، لكننا لم نستطع أن نعمل صناعة السياحة وعندنا آثار ونحن أعظم دولة عندها آثار لا يوجد عندنا مستشفيات دولية للعلاج".
وأشار إلى الاستثمار ووصفه بالاستثمار الكاذب والذى يتركز فى لعب الأطفال والمشروبات، وقال إن حجم الاستثمار فى الموازنة العامة 40 مليارا و"إننا دولة فاشلة فى الاستثمار الأجنبى ويجب أن نضع شروطا فيأتى المستثمر بشروطى أنا ولو طلبوا عمل استثمار فى أدوات التجميل نقول لهم شكرا احنا حلوين من غير حاجة وتكون العمالة مصرية حتى نحد من البطالة".
وقال الشيخ على قطامش المرشح الفردى " الإعلام جعان شتائم فينا ويوجهوا لنا الاتهامات انتم ناويين تقطعوا ايدى البلد أقول لهم اين سماحة ورحمة الإسلام وفى عام الرمادة سيدنا عمر أوقف حدود الله و40 % من الشعب المصرى تحت حد الفقر يعنى مجاعة والشعب " متنيلين" على عينهم مش عارفين يتجوزوا نجوزهم الاول وكثير فى البلد نحن لن نتبدل على الشرع لكن نبنى البلد الأول نبنى مصر، العاطل يشتغل والجعان يشبع و الفقير جيبه يمتلأ وبعد كده نعمل قانون العقوبات لا عذر لأحد".
وقال علاء رمضان القيادى السلفى " احنا اسسنا حزب النور فى فترة 6 أشهر فقط وعملنا تحالف اسلامى فى 48 ساعة وحققنا المرتبة الثانية فى المرحلة الاولى من الانتخابات ونريد سياسة تعتمد على ديننا وشرعنا واخلاقنا ولن نفقد ابدا اخلاقنا بسبب مقعد فى البرلمان .. ومعندناش حاجة اسمها فصل الدين عن السياسة".
.
وأضاف :"إننا نؤيد السياحة الحلال التى تم تطبيقها فى تركيا فهى تحقق دخل اعلى من السياحة الحرام ودة بعد تطبيقه عندنا هيكون ردا على الناس اللى بيتهموا الشعب المصرى انه مفيش عنده الا المايوهات".