مين اللى خانك؟

الظلم عشعش فى البيوت
ناسج خيوط العنكبوت
وألف صرخة ماليها صوت
صبح الكلام زى السكوت
نحلم بحلم نصحى يموت
والشعب جاع مش لاقى قوت
متحنطين جوه التابوت
تماثيل خشب من غير خيوط
فى 18 يوم يا بلد قامت قيامتك
رجع شبابك عزتك وليكى ابتسامتك
بانت معادن وحدتك وظهرت شهامتك
والشعب قام أسراب جراد
خرجوا الشيوخ ويا الولاد
وكتبوا ليكى فى الزمن تاريخ ميلاد
صرخة صحت اللى ماتوا فى القبور
والزحف كان على الميدان طريق عبور
رجع ظلام الدنيا نور
رجع التاريخ يكتب سطور
يبقى شعبك يا بلادى خالد فوق العصور
متحديا كل الصعاب عابر كل الجسور
خارقا للمعجزات كاسرا مثل الصقور
حينما ضل الطريق قرر أن يثور
والشعب قال بعلو صوته لازم يسقط النظام
ستين سنة حكم عسكر عتم الشمس بظلام
ولد فى قلب الشعب خوف خرس الكلام
الثورة فين يا بلد ومين سرقها
ولاتاهت مننا وضلت طريقها
غير صورة حلوة فى الميدان
نفسى أعرف مين حرقها
النظام ولا الفلول
ولا مجلس المغول
ولا شيخ فى الأصل غول
ولا هيا ثورة بدون حلول
لو حد فاهم فى الأصول
ييجى يقول
يجى يقول لى الثورة فين
هى خلصت وكنت نايم ولا ماتوا المصريين
كل شيخ وليه طريقته وإحنا بس نقول آمين
ده يغنى وده يسقف وإحنا ليهم رقاصين
طب حد يصدق الفلول مترشحين
طب حد يقولى الثورة قامت ضد مين
ضد المعارضة أصلا مكنش فيه معارضة
دول شوية طبالين
اللى يقول عايزنها حره واللى يقول عايزنها دين
لعبة سياسة وشغل سيما
مليون قناع للكدابين
زفة وكترو الزمارين
نفسى أعرف هو مين
مين اللى خانك يا بلد ومين سرقنا
مين اللى ضلم دربنا وسود طريقنا
مين اللى نشف أرضنا لما شرقنا
ومين اللى داس فوق حلمنا لما غرقنا
عايز أعرف يا بلد مين اللى خانك
مين اللى دمر حلمنا وضيع أمانك
مين اللى عايزك تغرقى ويلغى كيانك
ومين اللى رجع عزتك وبدمه صانك
فين بصيرتك فين إيمانك
عارفة مين يا أمى اللى خانك
عسكرى راكب حصانك