زاهى حواس يكشف لتليفزيون اليوم السابع أسرار المومياوات وتفاصيل الموكب

قدم تليفزيون اليوم السابع تغطية خاصة للاستعدادات النهائية لموكب المومياوات الملكية، من إعداد محمد الحناوى وتقديم رغدة بكر .
واستضافت التغطية الدكتور زاهى حواس عالم الآثار والذى تحدث عن الموكب، وقال: "حصل موكب قبل كده لنقل المومياوات بس مش بالتجمع ولا الشكل ده.. لما سافر رمسيس الثانى إلى باريس قوبل باستقبال شعبى ورسمى ولما جبت مومياء الملك رمسيس الأول من أتلانتا لجورجيا في أمريكا قوبل في المطار ولا ملك حى.. ولما نقلت تمثال رمسيس مصر كلها سهرت لحد الصبح".
وأوضح حواس: "لما قررنا يكون في متحف الحضارة اللى أنا سعيد إنى بنيته بالتعاون مع وزير الثقافة الأسبق فاروق حسنى عملنا حسابنا إن المومياوات هتعرض في هذا المكان.. فبلا شك أنه لما تنقلى المومياوات هيكون في نفس الاهتمام".
وأضاف حواس: "ما سيحدث اليوم زفة فرعونية بتخلق لب كل إنسان في الدنيا هيشوف الموكب.. ومصر بتكسب دلوقت سياحة وثقافة وسياسة.. وكل الناس في كل مكان هتشوف اللى بيحصل في مصر وهيحسوا بجمال مصر.. وده هيعود بالخير علينا في أكتوبر اللى جاى لأن الناس أول ما هتشوف المومياوات من بيوتها ده هيدعيهم كلهم إنهم يجوا مصر".
وتابع حواس: "عندنا 22 ملكا وملكة بيرجعولنا أحداث سحرية في الماضى.. وكل ملك وملكة عندهم قصص وحكايات ومؤامرات وكل القصص دى بتدب في شوارع القاهرة .. حصلت من 3 آلاف سنة وبترجع تانى".
وعن دور الفنانين في الموكب قال حواس: "هما بيساعدوا في الترويج لكن الدور الأكبر للمومياوات".
وعن أبرز المشاهد في الموكب قال حواس: "كل الشوارع هتبقى فاضية و48 دقيقة كل ملك بيتحرك بالعربية بتاعته بيقول للناس إحنا العظماء اللى حكمنا الدنيا بالحق والعدل وده مشهد عظيم ولا هيحصل زيه في الدنيا".
وعن أبرز القصص الخاصة بالملوك، قال: "الملك سقنن رع اللى قاد حرب التحرير ضد الهكسوس.. إحنا تأكدنا إنه مات في حربه ضد الهكسوس من خلال فحص أسلحة الهكسوس".
وأضاف: "مومياء حتشبسوت أنا كنت سعيد جدا إن أنا اللى اكتشفتها وللأسف بعض الناس بيقولوا ده مش بتاع حتشبسوت .. ودول لازم يقروا ويتعلموا".

وتابع: "ثالث أبرز القصص.. مؤامرة الحريم.. الملكة تيا زوجة الملك رمسيس الثالث حاولت تقتل زوجها علشان تنصب ابنها ملكا على مصر .. المؤامرة الفرضية مقالوش انه مات .. لكن لما حطينا المومياء تحت الأشعة المقطعية تأكدنا انه اتدبح من الخلف".
وأضاف: "رمسيس الخامس مات بالجدرى.. تحتمس الثالث كان عنده أمراض في القلب.. وعندنا رمسيس الثالث عنده تصلب شرايين.. وعندنا قصص لا تنتهى".