شيلى دموعك

قيدى شموعك * مدى الخطوة تلاقى نهار
شمس تاريخك عادت تانى * قمرك لف الدنيا ودار
مجدك أصبح تانى يغنى * لما شبابك هب وثار
ورد جناينك فتح عوده * حطم كل سنين العار
حطم كل قيود الباطل * تلاتين حزن وفقر مرار
كانت شلة لابسه قناع * بايعه ضمير والنية دمار
خنقوا الضحكة جوا حناجرك * خلوا الحلم معاكى ينهار
كانوا يقولوا دى أزهى عصور * كرسى العرش وريث بقرار
كل الصورة كانت شخابيط * مخ العاقل كان محتار
خلوا طيور العش تهاجر * جابوا الأهبل ع الزمار
ترفع صوتك تبقى ضحية * ألفين تهمة وسجن وتار
لما الباطل عدا حدوده * حاكم شعب بقيد من نار
قوت أولادك كان منهوب * رشوة فساد تعتيم أخبار
هب شبابك من تحريرك * قال هنصحح كل مسار
جابلك شمسك بعد غياب * وكل رجولة وليها أسرار
خلوا الدنيا تشهد تانى * إنى المصريين أحرار
انس جراح التلاتين حزن * ولسه طريق الحلم خضار
شيلى دموعك قيدى شموعك * مدى الخطوة تلاقى نهار