والمحاكمة النهاردة بَقتْ حقيقة!!

من يناير للنهاردة عَدِتْ شهور
واحنا لسه زى ما إحنا
وسط دوامة كبيرة تِلِفْ بينا
وإحنا فيها واقفين نِدُورْ
المطالب نفس المطالب
والكلام نفس الكلام
والسُطور نفس السُطور
عن حقوقنا وملياراتنا
وعن بيوتنا وعن قصور
عن سفن شَالِتْ و خَبِتْ
وجَرْى هِرِبِتْ فى البُحور
وطيارات راحتْ وعَبِتْ
بإسم قائد للعبور
......................
بَسْ يا خسارة القيادة
لما تتحول لِعَادةْ
وأما شَهوة الوراثة
تِحَوِلْ القائد لبائدْ
ويبقى عِبْرَةْ ويبقى محبوس
بدال ما كان نِسر النسور
وآهى دايرة ودايرة بينا
ولو نسينا ..
الدنيا يوم لازم تدور
......................
ياترى .. المحاكمة حق
أَخَرُوه ليه من يناير؟
ولا بس يِظْهَرْ بِضَغْطْ
ووقف حالنا كل جمعة
من مظاهرة لمظاهرة تانية
والميدان بركان يِثُور
......................
الكلام عن المحاكمة
بس رغبة فى المحاكمة
وللا رغبة فى العدالة
إللى مقصود يا ترى
عدل وحقيقة
وللا مقصود منظرة
وحُبْ الظهور
.....................
يعنى إيه المحاكمة تبقى قصة
وكام سيناريو وكاميرات
علشان نشوف
وفيلم هَنْصَور و نِبْعَتْ
والمتاجرة بدم شُهدا
والكلام ببلاش وعَبِى
للصحافة والكتابة والحروف
والبرامج وتُكْ تُكْ يا شو
وَلَّعُوها ويا الضيوف
العدالة إستحالة تكون كلام
وإستحالة قبل المحاكمة
هاتوا سِكِّينْة الخروف
مش بدافع عن جرايم للنظام
النظام راح لِحالُه والسلام
وأنا دُقْتْ من هَمُه صُنوف
و إنْكَوِيتْ من عمايله
زيِى زَى بَقيتْ ألوف
وشُفْتْ يا ما ناس عَرايا
فى عز الشتا ما تعرفش صوف
ياما حسيت بالغلابة
إللى نايمه على الرصيف
وكنت أسمع عن رقاب
ياما طارتْ من مُسدس
وإللى طارتْ من سِيوف
بس إللى عاش طول عمره حُرْ
دَمْهُ حُرْ , قلبه مابيعرفش خُوف
من سنين بأكتبْ وأعارضْ
والمعارضة فى رأى حُرْ
رأى مكتوب فى القصايد
المعارضة مش شِتِيمة
وللا سَبْ فى الجرايد
المعارضة مش بس أخالف
وللا أقلل من عمايل وللا أزايد
المعارضة مصلحة بلدى أهم
وأما تحتاجنى تلاقينى واقف بأساعدْ
وأما تحتاج للبُنَا أبنى وأساندْ
...................
لكن أما يبقى خِصمِى
خلاص مِطَاطِى أو ضعيف
أسيب أُمُورُه للمحاكمة والعدالة
وشرع ربى والظروف
غلطتى قلبى نضيف
عمرى ما عرفت إنتقام
ولا قُلتْ أنا نفسى أشوف
وللا كان همى الكلام
بس عشان أكتب وأنشر
وأبقى مشهور فى البرامج
بأمشى بكتابتى أطوف
..........................
ميت خسارة لأنه مصرى
كنا نتمناه شَرِيفْ
عمرى ماتمناها حالة للشماته
إستحالة .. يا لطيف
افتح التلفاز وشوف كل الكلام
كل يوم عن المحاكمة
دى محاكمة والسلام
وللا شهوة الإنتقام
صدقونى سيبوا حُكْمُه للعداله
والقَدَرْ عَدْلُه إستحاله يوم يِميل
وإللى زَرعْ زَرْعَة بِيجنى زرعته
وإللى مَالْ فى الحكم أحكامه تِميل
وإللى حفظ العهد حَفَطُه
وإللى صانُهْ
هيلاقى من صان الجميل
بُصوا لبلدنا و حَالْهَا
لو عاجبكم مستحيل
البلد محتاجه ثورة فى النفوس
والنفوس عاوزه دليل
والدليل محتاج لحكمة
والحكمة محتاجة لقائد
يَاخُدْ بإِيْدِيهَا و يشيل
..................
والعدالة مالهاش عيون
الميزان له كفتين
وإللى قَصْدُه الحق
يسمع للآيات لو كلمتين
الكتاب فيه كل حاجة
و المحاكمة النهاردة بَقتْ حقيقة
والحقيقة .. حق و دينْ
وللا بس عشان نشوف
وعشان نِرَيَّحْ شَماتينْ
سيبوا قَدَرْ الله يقرر
وسيبوا أمرُه للمحاكمة
حتى لوطالتْ شهور
حتى لو أخدتْ سِنين
المحاكمه
يعنى شرع الله وحُكْمُه
عَدْله فيه كل الحقيقة
عَدْله فيه كل اليقينْ
وإللى كَاتْبُهْ الله يِكُونْ
وحِدُوهْ يا مْوَحِّدِينْ