حُكُومَةْ المِْيدَانْ

هنا حكومة ورا حكومة ورا حكومة
وكام ساعة بألف وزير
وراس وزرا بِتِْثَبِتْ
وراس وزرا هناك بتِطِير
........................
كل الشعب بقى عنده بحور حِكْمَة
كل الشعب بقى واعى وفيه حُكَما
ودا أحلى ما فى الثورة وفى التغيير
و سِرْ الثورة فى حكومة وفى التوزير
وسِرْ الحكم فى حكومة ولا الأساطير
وزير قاعد.. وزير رايح
وزير تانى هناك دايخ
كأن الوزرا حنفية
ومفتوحة على التحرير
........................
وزير يِقْبَل.. وزير يِرفُضْ
وزير يجرى يجيب له سرير
وزير تانى يقول جَانى
جواب مختوم بختم النسر وسره فى بير
بأنى بكرة هَتْعَيِنْ وبعده بيوم
أروح أقعد فى بيتى غَفير
..........................
وزير ثورى كلامه يحققه فى ثانية
وزير جاى معاه خطة يِكَسر بها الدنيا
وزير تانى ماهش ثورى أتارى خطته فانية
وزير قلنا عليه مظبوط
وزير غيره وجَاى بِنْقُوط
وزير شُوفوا جاى المجلس شايل نَبْوُتْ
وزير داخل يقول هُسْ ما أسمع صوت
كل الوزرا يدوب كام يوم
فى وزارة بعدها هتموت
........................
خلاص الشعب بِيْقَرر
و بِيْنَفِذْ وبِيْحَرر
خلاص الشعب بقى يِقْدَر
خلاص الشعب عنده ميدان
يقول رأيه من الميدان وبِيْغَير
خلاص كلنا بنقول
مفيش واحد هنا بيِصْبُر ولا يْصَبَرْ
...........................
بقينا كلنا زُعَمَا
بقينا كلنا حكومة فى وسط ميدان
بقينا كلنا بنفهم ونتكلم
وشوف يا زمان
بقينا إحنا إللى بنعين.. ساعات نرفُض
ساعات تانية نقول عادى ياخُدْ فرصة
بلاش نِحْرِمُه منها يجوز خبرة وعنده لسان
وجايز بعدها نشيله
نقول لأ.. ماتنفعناش مواويله
طلع خِيخَه بِنُُصْ لسان
وعنده مشكلة فى الحل
وعنده مشكلة فى الربط
وحتى عنده ضعف إيمان
.......................
وطول ما إحنا إللى بنقرر
خلاص الخير بقى هَيْعُمْ
خلاص عِشْنا مفيش حرمان
ولا سُلطَة هَتِحرِمنا
ولاحكومة هتظلمنا
ولا رَيس وداخلية
ولا عادلى وظُلمْ طوفان
..........................
خلاص الفَسَدا هناك فى السجن
وأحلى كِلمة بنقولها .. نغنى لها
دى كِلمة سجن
وأحلى سجن عاشقينه ونستنى ملايينه
وبِنْدَلَعُه بِبُورتُو وفى الأصل اسمه لُومَانْ
....................
خلاص كلنا أحرار
ومصر تعيش فى حرية بلا سجان
خلاص كلنا بَرة
تعيش ثورة ورا ثورة
ومصر تقول
يعيش شعبى كده بعقله
مافِيهْشِ جنان
تعيشى يا مصر ضَمَة الكل
فيكى من زرع حَنضَل
وفيكى من زرعها بفُلْ
ولسه يا غالية رغم الحزن
بحر حنان!!