أنا نازل التحرير.. قصيدة للشاعر عمرو جمعة

أنا نازل التحرير ...
صوتى راح
قلبى راح
عمرى راح
وبادفع الفواتير !
أنا نازل التحرير ...
.... ....
.... ....
مش بلطجة وعصيان
ولا منظرة فنان
أنا نفسى أكون إنسان
أحلم وأغنى وأطير
أنا نازل التحرير ...
.... ....
.... ....
الثورة واتسرقت
الفكرة واتحرقت
والقِلَّة واندست
هو كده التنوير ؟
أنا نازل التحرير ...
.... ....
.... ....
كل الولاد بتنادى
م الجامعة للإعدادى
حتى الرفات فى الوادى
وبتطلب التغيير!
أنا نازل التحرير ...
.... ....
.... ....
الشرطة ها تفضل شرطة
والبلطة ها تفضل بلطة
والشهدا يموتوا بغلطة
ياخدوا نياشين .. تزوير !
أنا نازل التحرير ...
.... ....
.... .... دستورنا يا دستور
اتكسَّر البنور
طالبين أساس بصخور
يكفينا عمر كبير
أنا نازل التحرير ...
.... ....
.... ....
كل السيوف فى الحلق
دايرة تهد الخلق
والبيض تعب م السلق
تشرب دمايا عصير ؟
أنا نازل التحرير ...
.... ....
.... ....
الكل ع الميدان
سِبح / آيات / صلبان
ها نغير العنوان
لسه أمامنا كتير
أنا نازل التحرير ...
.... ....
.... ....
قلبى عليك يابنى
الحلم ما بيبنى
والعمر بيسبنى
أنا كنت ناوى أجير
أنا نازل التحرير ...
.... ....
.... ....
لو فشلت فيكو البركة
والبركة بتيجى بحركة
والحركة تزق الحركة
ما تفسروش فوازير !
أنا نازل التحرير ...