آخر الشارع

حيران واقف وسط الزحمة
فين الرأفة.. فين الرحمة
ولا ليك ذنب ولا ليك تهمة
إلا وجودك وسط الشارع!!
***
أتوبيس رايح.. توك توك جى
واقف قاعد .... ميت حى
تبقى فى حارة تبقى ف حى
لازم حتماً تيجى الشارع!!
***
ليه ماشيين زى التايهين؟؟
مانتاش عارف مين مع مين!
تعمل ايه.. غلبان مسكين؟
عقلك شت ورجلك جت
ولا ف حسابك ليه الشارع!
***
ناس بيقولوا هناك ف الأوِّل
فى عمود نور لازق فى محوِّل
شكل الشارع ليه بيتحوِّل
امشى بسرعة واوعى تطوِّل
لو مامشتش هيمشى الشارع
***
كان فيه شارع مالهوش آخر
دوشة وهيصة وناس مرصوصة
واقفين خلق وفين الأخر؟؟
دا طابور عيش مصر المحروسة
****
فيه ناس واقفة هناك م العصر
فيه ناس قالوا بقالهم شهر
حتى رغيف العيش ليه مهر ؟!
حتى اللقمه تاخدها بكوسة؟!
تصلب طولنا لأخر الشارع
***
شوف أحوال الناس فى الشارع
ناس فى الأول ثابتة وواقفة
ناس ع الآخر هادفة وعارفة
فيه ناس عاشت ماتت رحلت
ولا يوم عرفت ايه الشارع !!
***
كان فيه ناس وسطيه محتارة
فين الآخر .... لو ليه أماره؟!
رد اخوننا بكل شطارة:
آخر الشارع عنده عمارة ...
آخر الشارع هتلاقى حارة ....
إسعى هتوصل آخر الشارع !!
***
آخر الشارع يطلع إيه؟؟
كنا شباب ماشيين فى الشارع
بعد الجامعة نزلنا الشارع
بعقول لامعة.. قلوب مجتمعة
قلنا هنعمل آخر الشارع
يمكن نوصل آخر الشارع!!
***
مش بنفزر ولا بنحير
إحنا شباب بطموح بيغير
بفنون وأدب مش متغير
كل هدفنا وكل أملنا
لو يوم نوصل آخر الشارع
***
فنان ريشته بترسم ذكرى
وأديب قلمه بيكتب بكرة
واديه بيكتب آخر الشارع
آخر الشارع.. صوت الشارع
آخر الشارع.. نبض الشارع