بعد زلزال الدويقة وانهيار صخور المقطم على رؤوس الفقراء والبسطاء الذين حلموا أن يعيشوا مستورين داخل أربعة جدران وتحت سقف يظلهم حتى ولو من الخشب والصاج، بعد أن انكشف المستور من الإهمال واللامبالاة، وبعد أن سالت دماء وتيتم أطفال وفقدت أمهات أبناءها وأزواجها، باختصار بعد كارثة الدويقة التى أدمت قلوبنا، بحثنا عن أفضل من يعرف المقطم ليروى لنا قصته، وحتى يشخص لنا المرض ويصف العلاج، ولم نجد أفضل من المهندس كمال غنيم أول من خطط وبنى على المقطم ليروى لنا قصة المقطم وأحجاره من بدايتها حتى سقوطها. 1 المهندس كمال غنيم لقبوه بكريستوفر كولومبوس المقطم، لأنه أول من اكتشفه، وعندما طلبنا منه أن يحدثنا عن الجبل ومخاطره، قال: "مش أنا أول واحد جه المقطم، أنا جيت بعد الإيطاليين". 2 الإيطاليين هما أول ناس جم هنا سنة 1954 واختاروا المقطم يعملوا فيه غابة للفسحة وللسكن الراقى، وكان تخطيطهم أن يكون نسخة من لاس فيجاس وفعلاً أول حاجة بنوها كازينو للقمار مازال موجوداً حتى الآن. 3 المهندس كمال غنيم قال إن المقطم استمر مكان جميل ومليان بالقصور والفيلل لحد ما شركة النصر مسكت إدارته سنة 1985 و ابتدا الخراب الكبير. 4 ابتدت التعاونيات تتبنى على الشارع الرئيسى الى المفروض يكون الواجهة. 5 المقطم لكن القبح مش فى المنظر بس لكن فى الجهل بالإدارة أو يمكن السرقة أو الاتنين، كل حاجة بايظة أسلاك محولات الكهربا تلاقيها مرمية وعريانة. 6 والشوارع الداخلية محتاجة عربية 4×4 علشان تعرف تمشى فيها. 7 المقطم .. الميه والمجارى .. فهما الكارثة إلى بوظت الدنيا فى المقطم وتحت المقطم. 8 يرى المهندس كمال غنيم أن قلب المقطم صخرى وقوى مش ممكن يحصل فيه انهيارات وإن مشكلة المقطم فى الحافة، لأن حافة أى جبل لازم تكون مدرجة وفيها ميل مش خط مستقيم، زى حالة المقطم دلوقتى بسبب التفجيرات العشوائية فيه. 9 مش بس كده وسابوا العشوائيات تتبنى فوقه وتحته. 10 والعشوائيات سلوك عام فى المقطم، فى مبانى الفقرا ومبانى الأغنيا. 11 شركة "إعمار" بتعمل كارثة على الحافة، التفجيرات تتم بمنتهى العشوائية، غير المساحات اللى احتلتها بوضع اليد ومحدش حاسس، أو يمكن حاسين ومطنشين. 12 الجيولوجيين عارفين إن الحافة بقت خطر واحنا ياما حذرنا واتكلمنا عنها. 13 الجبل ابتدى يغضب ويثور وصخوره ابتدت تهاجم الناس فى بيوتها. 14 والناس يصوتوا و يقولوا الحقونا. 15 وما فيش فايدة، محدش اتحرك. الكل ماشى بسياسة طفاية الحرايق اجرى الحق لما تحصل الكارثة وعمرهم ما قالوا اجرى عالج قبل ما تقع الكارثة. 16 انهارده أنا بحذر تانى العلاج اللى بيتم غلط ومليان سرقة الهضبة الوسطى اللى بيحصل فيها الانهيارات، المفروض تتعالج بطريقه مظبوطة. مسئولين شركه النصر قالوا إنهم صرفوا 2 مليون جنيه لعلاج الشق ده. 17 طب ليه الشق بيزيد، وليه أصبح باب جهنم بيهدد الناس بكوارث جديدة؟ 18 بسبب الشق دى الجهة القبلية ومعرضة لانهيارات تانية متعددة, اللى بيحصل هنا، إنهم بياخدوا أى ردم طالع من أى حد بيبنى ويقلبوه هنا قال إيه بيعالجوا الشقوق والانهيارات. 19 بينما طبقات الردم لازم تكون من نوعيات مختلفة ولازم تكون متجانسة بشكل معين، مثلاً مقاسات الأحجار المفروض تكون 3 و4 و6 علشان ما يكونش فيها فراغات وأثناء الردم لازم يكون فيه ميه وضغط علشان الشقوق دى تقفل زى هنا. 20 لكن الى بيحصل مجرد علاج سطحى مش علاج لفترة طويلة . والغريب إن كل الناس عارفة وفاهمة الكلام ده وبالرغم من كده ساكتة وبتصرف بالملايين، وكأنها بتخطط وبتنفذ عمليات تخريب منظمة، ضد المستقبل، وضد أجيال كاملة. 21 لسه الشركة بتعالج غلط ولسه المجارى بايظه. 22 ولسه فيه بيوت حاضنها الجبل. 23 والآخِر يقولوا القضاء والقدر. 24 حاجة تخلى الحجر ينطق. 25 الجبل بيقول لكم: عندما سقطت أحجارى على هؤلاء الفقراء وقتلتهم، قالوا إن الجانى هو القضاء وإنى ساعدت القدر، سأظل أحكى قصتى فقط لتعرفوا أنى برئ من دم الضحايا وأن القاتل هو إهمال و تقصير البشر. لقد ظللت مراراً أنذركم ولكن ما من أحد منكم أخذ حذره فلا تلومونى ولا تحملوا القدر الذنب ذنب القتلة المهملين الفاسدين، ارجعوا إليهم وحاسبوهم. 26 لكن قبل ذلك، أوقفوا نزيف الحجر ليتوقف نزيف البشر.