فى الندوة التثقيفية ال30 للقوات المسلحة.. الرئيس يكلف كامل الوزير بتطوير وزارة النقل والسكة الحديد.. السيسي: المتسبب بحادث محطة مصر سيحاسب ولن نترك حق المصريين.. ويؤكد:4 تريليونات جنيه تكلفة المشروعات الجديدة

شهدت الندوة التثقيفية الثلاثين للقوات المسلحة للاحتفال بيوم الشهيد، العديد من الرسائل المهمة للرئيس عبد الفتاح السيسي، والتى كان أبرزها إعلانه محاسبة المتسبب فى حادث محطة مصر الأخير بالقانون وتشديده على عدم ترك الدولة لحق المواطن المصرى.
وبدأت فعاليات الندوة التثقيفية الثلاثين للقوات المسلحة، بقراءة القرآن الكريم، بعدما وصل الرئيس عبدالفتاح السيسي، رئيس الجمهورية القائد الأعلى للقوات المسلحة، إلى مقر مركز المنارة للمؤتمرات، لحضور الندوة التثقيفية للقوات المسلحة للاحتفال بيوم الشهيد.
وقال الرئيس عبد الفتاح السيسى إنه سيتم محاسبة من تسبب فى حادث محطة مصر بالقانون.
وأضاف الرئيس السيسى خلال الندوة التثقيفية للقوات المسلحة بمقر مركز المنارة للمؤتمرات، للاحتفال بيوم الشهيد: "لن نترك حق المصريين".

الرئيس السيسي: حرصنا على عدم سقوط مصرى واحد خلال أحداث محمد محمود
قال الرئيس عبدالفتاح السيسي، فى كلمته خلال الندوة التثقيفية ال30 للقوات المسلحة بمناسبة يوم الشهيد: حرصنا على عدم سقوط مصرى واحد خلال أحداث محمد محمود.

السيسي للمصريين: لا أخشى عليكم من الخارج.. ودماء الشهداء لحماية الوطن
وأشار الرئيس عبد الفتاح السيسي، إلى أنه لا يخشى على المصريين من الخارج، بل من الداخل، قائلا: "لا أخشى عليكم من الخارج أبدا ولكن أخشى عليكم من الداخل فقط، ومن أنفسنا، والكلام اللى بيتقال النهاردة على الشهيد.. دى دماء بذلت لأجل حماية الناس والوطن والحفاظ عليه".

وأضاف الرئيس السيسى خلال كلمته باحتفالية يوم الشهيد بالندوة التثقيفية الثلاثين للقوات المسلحة بمركز المنارة، "كانت فيه مطالب كتير أثناء أحداث محمد محمود، منهم مطلب المجلس العسكرى يمشى، كنا حريصين أن مفيش مصرى يؤذى أو يقتل".

السيسى: الخسارة من 2011 ل2015 ضخمة وهنفضل ندفع ثمن كبير جدا لتعويضه
قال الرئيس عبد الفتاح السيسى: "نشعر أن فيه حد وسطنا يشككنا فى أى حاجة، عدا الأمور المتعلقة به هو، وهذا ليس من الأمانة أو الصدق أو الدين، لأنه إحنا مصريين مع بعضنا البعض، وهناك من يتصور أن يستبيح دمنا وآمالنا وأفكارنا ويشوهها عشان يهدم البلد فهذا ليس من الدين من شىء".

وأوضح الرئيس السيسى، خلال الندوة التثقيفية للقوات المسلحة بمقر مركز المنارة للمؤتمرات، للاحتفال بيوم الشهيد، : "كنت مسئول عن المخابرات العسكرية أو الحربية والأجهزة الأمنية، خلال أحداث محمد محمود، وأقدر أقول بجلاء وثقة وأمانة وشرف إننا لم نمس مصرى واحد خلال هذه الفترة، ولكن لما دخلت العناصر أمام وزارة الداخلية سقط القتلى يوم بعد يوم لأكثر من 6 أيام، واتعملت منصة عشان تجيب باقى الدولة الأرض".

وتابع: "كان المطلب أن المجلس العسكرى يمشى، فعشان يمشى كان مطلوب عمل حالة تخلى كل الرأى العام مش راضى ومتألم ورافض، ولازم يمشى، لأنه القتل الذى يتم يجرى بإسمه.. والله أنا قلت من 3 سنوات اعملوا لجنة لدراسة كل الأحداث التى تمت فى 2011 و 2012 و 2013 لنضعها أمامكم بأمانة وشرف لتعرفوا كيف البلدان تدمر وتضيع".

وأضاف: "رئيس الهيئة الهندسية خلال أحداث محمد محمود، قالنا له لو معلمناش فاصل بين شارع محمد محمود البلد وميدان التحرير، البلد دى هتضيع، وخلال يوم و2 3و 4 و 5، اتقفل، وانتهت أزمة القتلى، لكن الصورة التى تم تصديرها أن المجلس العسكرى قام بهذه العملية، كما تم تصدير أحداث ماسبيرو وأحداث بورسعيد، كما تصدر أن وزارة الداخلية قامت بقتل الناس فى 25، وأنا مش بزور التاريخ".

وواصل:"الوقت دا اتعملت عملية شديدة الإحكام لقتل الناس والصورة تطلع كدا والدولة تسقط، وأنا بقولكم يا مصريين حجم الخسارة من 2011 ل 2015 حجم ضخم جدًا، وهنفضل ندفع ثمن كبير جدًا لاستعواضه، لأنه الناس لم تكن تعلم قدرة تأثير شبكة التواصل الاجتماعى فى إدارة الأزمة، وكانت المطالب تلقى على الشبكة، وتاخذها وسائل الإعلام فى التوك شو بالليل عشان تبقى مطالب واجبة التنفيذ".

الرئيس السيسي: المشروعات القومية الجديدة لا تكلف موازنة الدولة شيئا
قال الرئيس عبد الفتاح السيسى، فى رده على انتقادات البعض للعاصمة الإدارية: "البعض يقول هيعملوا 200 مليار جنيه فى العاصمة الإدارية بنية أساسية.. طيب أسيوط الجديدة ورشيد والمنيا الجديدة والسويس الجديدة.. يا جماعة اللى بيطرح الطرح ده عوز يألمك ويوجعك ويزعلك وينغص عليك عيشتك ".

وأوضح الرئيس السيسى، خلال الندوة التثقيفية للقوات المسلحة بمقر مركز المنارة للمؤتمرات، للاحتفال بيوم الشهيد: "طيب والله والله والله كل المدن الجديدة مش معموله من موازنة الدولة .. طيب تقولولى بتعملوا ايه.. بتحفروا وتجيبوا فلوس من الأرض؟.. لا إحنا بنحول الأراضى اللى بلا قيمة إلى أراضى ذات قيمة.. بنعمل طريق فى أسيوط الجديدة ومحور لنعبر به بين النيل الغربى والشرقى، وعملنا حاجة وأراضى ونطرحها للبيع، والفلوس دى بندعم بيها الشغل، وهذا الكلام ينطبق على العلمين والمنصورة وأسيوط والمنيا، وأى حاجة كذلك، وبنحاول تحويل الأراضى محدودة القيمة إلى أراضى ذات قمية مرتفعة، من خلال تطويرهم بما فهيم العاصمة الإدارية الجديدة، والفلوس بنعمل بيها بنية أساسية، وقلت الكلام قبل ذلك وأقوله مرة آخرى".

وواصل: "ممكن أطلع كل يوم فى التلفزيون، بس انتوا تزهقوا منى ومعنديش ملكات الإعلاميين وأنا أتحدث كمصرى إنسان منكم، وأنا بقولكم أنا مش رئيس لكم أنا واحد منكم، ووالله لأقف أنا وانتم أمام الله أسألكم كما تسألونى وأحاسبكم كنا تحاسبونى لأنه إحنا بعمل كدا عشان خايفين عليكم".

وأضاف: "السنة فيها 52 أسبوع، عدد أسابيع المظاهرات فى مصر، خلال 2011 و 2012 و 2013و 2014 بمعنى 200 أسبوع مظاهرات فى 4 سنوات.. سياحة إيه اللى تشتغل؟ ومصالح ايه اللى تتحرك وتجارة إيه اللى بتمشى، .. هو إحنا آخر النهار بناكل ولا نقول إحنا فى المظاهرات؟.. الاحتياطات اللى راح فى سنة ونصف منذ 2011 رغم تشكيله خلال 20 عامًا، وكان 38 مليار دولار، واتشطب لأنه سنة ونصف الجزء الاكبر منهم".

وتابع: "الدول جنبنا تتحدث عن الأوضاع الاقتصادية والظروف، وهى تضيع فى بلدانها وكل الكلام دا له ثمن ولازم يدفعه الشعب، والأولاد الصغار والأجيال القادمة.. الاستقرار استثمار".

السيسى للمصريين: "هل وعدتكم وأخلفت؟.. إحنا كحكومة عاوزين نخفف عن أهلنا"
رد الرئيس عبد الفتاح السيسى، على الشائعات التى أطلقها البعض على حملة 100 مليون صحة، قائلًا: " فيه شائعات كثيرة تقول أن التطعيم الذى يتم فى حملة 100 مليون صحة يؤذى الناس.. إحنا نقدر نعمل كدا فى أنفسنا وأولادنا؟!.. ياااه .. البعض يصدق ذلك".

وأوضح خلال الندوة التثقيفية للقوات المسلحة بمقر مركز المنارة للمؤتمرات، للاحتفال بيوم الشهيد: "الحملة للتخفيف على أهلنا، فقد كنت متألم من فيروس سى وموجوع كمصرى لأهله وناسه، وقوائم الانتظار التى كان مطلوب التصدى لها 18 ألف، بينهم 6 آلاف عملية تم الانتهاء منهم، وتم إجراء دراسة حول التكلفة التى وصلت 235 مليون جنيه لعلاجهم، ولكننا استطعنا إنجاز أكثر من 100 ألف حالة على قوائم الانتظار.. إحنا كحكومة ودولة ومسئولين، عاوزين نخفف عن أهلنا ولا نضيعهم؟.. دول 100 ألف من 100 مليون، وبقول ذلك عشان كل أسرة تنتبه مع أبنائها".

وواصل: "هل وعدتكم فأخلفت؟.. قلت لكم معايا السمن والعسل بقدمهولكم؟..هاتوا كل تصريحاتى لما قلت نبقى مع بعض فى مواجهة تحديات مصر، وقلت التحديات كثيرة، وفى كل لقاء مع الوزراء أتحدث عن ذلك.. التكرار تثبيت توصيف الحالة، كما أكرره الآن".

السيسى يكلف اللواء كامل الوزير بتطوير وزارة النقل ومرفق السكة الحديد
كلف الرئيس عبد الفتاح السيسى اللواء كامل الوزير بتطوير وزارة النقل ومرفق السكة الحديد بحلول عام 2020.

وقال الرئيس السيسى خلال الندوة التثقيفية للقوات المسلحة بمقر مركز المنارة للمؤتمرات، للاحتفال بيوم الشهيد: "المشروعات الجديدة تكلف خزينة الدولة 4 تريليونات جنيه".

كامل الوزير يتعهد بتطوير مرافق النقل: "هتبقى من أنجح وأحسن الوزارات"
تعهد اللواء كامل الوزير، رئيس الهيئة الهندسية للقوات المسلحة، بالنهوض بكل هيئات وزارة النقل، قائلا: "هنثبت لكل المصريين أن احنا مش وحشين وان احنا ناس مصريين وطنيين بنحب بلدنا زى كل المصريين فى كل قطاعات الدولة".

وقال اللواء كامل الوزير، خلال الندوة التثقيفية الثلاثين للقوات المسلحة، بحضور الرئيس السيسي، "مش هنام وهنواصل الليل بالنهار، وهايلاقونى فى وسطهم يوم الجمعة الصبح، وهايلاقونى فى وسطهم بالليل والفجر، وان شاء الله هنثبت لسيادتك ولكل المصريين، أن مصر لما يتوفر ليها قيادة سياسية واعية عاوزة تغير بلدها كل المصريين هايقفوا وراها".

وتابع قائلا: "هنوعد أن وزارة النقل هتبقى من أنجح وأحسن وزارات الدولة وهتبقى قاطرة التنمية أن شاء الله لكل مصر".

قال الرئيس عبد الفتاح السيسى، : "كيف يمكن الحديث عن لقمة العيش ونحن نكرم أمهات وزوجات الشهداء.. أقول للست دى إيه.. إنت بتتكلم فى لقمة عيش وهى بتتكلم فى دم أبنها وزوجها؟".

وأضاف خلال الندوة التثقيفية للقوات المسلحة بمقر مركز المنارة للمؤتمرات، للاحتفال بيوم الشهيد، : "أقولها إيه؟.. دى قدمت دم ابنها وزوجها لأجل خاطرى وخاطرك، وهتعيش باقى عمرها يعلم بيها ربنا.. أقولها إيه؟.. عاوزين ناكل؟.. هما راحوا عشان خاطر مصر تقعد.. طيب إحنا نخلى بالنا منها ولا نضيعها كمان.. ردوا عليا يامصريين.. ردوا عليا.. هنخلى بالنا منها.. باقلنا 6 سنوات ننزف.. الشهيد والمصاب، مش بس فى الجيش والشرطة.. هو اللى تم استهدافهم فى الكنائس ومسجد الروضة مش دم؟".

الرئيس للمصريين: "تزعلوا من السيسى ميجراش لكن المهم البلد تعيش"

تحدث الرئيس عبد الفتاح السيسى، عن حادث قطار محطة مصر، قائلًا :" عملنا فى قانون الخدمة المدنية إجراءات عشان نظبط أدائنا، مش عشان نعذب ولادنا.. طيب ينفع واحد واخد استروكس ويركب قطر.. ويبقى صاروخ طاير عل الأرض ويضيع ولادنا وأهلنا فى المحطة.. لا ".

وأضاف خلال الندوة التثقيفية للقوات المسلحة بمقر مركز المنارة للمؤتمرات، للاحتفال بيوم الشهيد، :"لن نسمح بذلك مرة أخرى، وسنحاسب القانون اللى بيتعاطى مخدرات سيتم انتهاء خدمته فورًا، والتحاليل يجب تنفيذها بصدق وأمانة.. متجيش بعد كدا وتقول عنده أولاد.. طيب واللى ماتوا معندوهمش أولاد وأهل؟.. لا عندهم.. وهذا الأمر على كل مرفق".

وواصل: "من ضمن الشائعات أن البعض قال أننا تحايلنا على كامل الوزير منذ 5 أيام.. هو إحنا عندنا فى الجيش ياكامل بنتحايل على حد؟.. كامل قال لى أنا تحت رجل مصر فى أى وقت، بس كان لازم موافقة البرلمان، وهو فى إجازة الآن.. دى الحقيقية يامصريين.. لازم البرلمان يوافق على الوزير اللى نرشحه ثم يحلف اليمين.. طيب البرلمان فى إجازة".

وأضاف:" أعطى لهذا المرفق واحد من أحسن ضباط الجيش.. وحجم الجهد الذى يقدمه لصالح المشروعات القومية أكثر من هائل وضخم جدًا.. وإحنا عاملين شغل يخلص 30 يونيو 2020 بتكلفة تصل ل 4 تريليون جنيه، نصفهم خلص والباقى جارى استكماله.. الدولة بتحارب الإرهاب وتقاتل وتنزف دم وتشتغل.. يد رافعة السلاح ويد تبنى ومش هتقف".

وتابع:"حجم التحدى كبير والناس تستعجل النتائج، وبالتالى قلنا كامل الوزير يتولى مسئولية النقل، والهيئة الهندسية بها ضباطها اللى يكملوا الشغل، ويتولى المهمة.. وأنتم سترون مرفق كالحديد فى 30 يونيو 2020.. وبقول لكامل: لك كل الدعم منى ومن المصريين والجيش والشرطة وأجهزة الدولة لينجح هذا المرفق، ولو عاوز ضباط لصالح الورش وكل ذلك معنديش مشكلة، ولا أعتقد أن وزير الدفاع سيبخل عنك او عن مصر.. كان عندى مشكلة كهرباء وغاز وشبكة قومية للطرق وبفضل الله خلصتها.. كان لازم نعمل كدا ونتحمل تبعاته وتزعلوا من السيسى ميجراش، لكن المهم البلد تعيش.. فالفكرة مش لأجل خاطر نعيش نضيع شعب".