كِلْمَة لِوجْه اللهٌ!!!

كلمة هاقولها لوجه الله
كلمة بجد
إللى بيحصل زاد عند حده
وفاق الحد.. وفوق الحد
نفسى نفكر
إمتى نحاكم وإمتى نقيم الحد
وإمتى نسامح
وإمتى نقول.. ربنا أكبر
حُكمُه العدل.. وحُكمُه أَحَدْ
وإمتى هنفهم معنى الدين للدين
وإمتى نفرق بين الجذب وبين الشد
وإمتى هنفهم معنى شماتة النفس
ومعنى نصون العهد
وإمتى نفكر فى هدف أكبر
من رغباتنا ومن شهواتنا
وإمتى هنسمع بعض
وإمتى نغير من أفكارنا
ونفهم فى الحرية
تسمع رأيى وأسمع رأيك
مهما اختلف الرد
وإمتى هنعرف إن النار
لو هنسيبها تشعلل جوة نفوسنا
تحرق كل الدنيا
وتزرع شوك جوانا بدل الورد
........................
إمتى وإمتى وإمتى..
وإمتى بألف سؤال
طبع دا فينا . الغل
وللا دا أصبح حال
وللا دا سببه العيشة المرة
ووقف الحال
ولا عشان قلنا اتغيرنا
يبقى نغير كل الدنيا
وكل الخير جوانا
يبقى خيال
وباسم العدل
ندوس على كله
وباسم المال
وباسم الخوف من رد الفعل
ما نحكم ع الأفعال
وبإسم دى بلدى.. أنا حر
ننسى الخير.. م الغير
وأبيع صاحبى وأخويا
لأى خلاف ف الرأي
ونبيع يا ما رجال
وقفوا معانا الإيد ف الإيد
وزرعوا فى أرضى رمال
شوفوا قوتنا لفين وبصوا بعيد
وإعرفوا مين بيحب الخير لبلدنا
ومين كداب محتال
......................
إيه غيرنا وضيع فينا الخير
قمنا بثورة عشان نتقدم
وللا عشان تغيير
وبدل ما هنتقدم خطوة
نرجع ورا للخلف كتير
مالنا.. كله يحارب بعضه
مابقاش فيه تفكير
عمرنا ما هنتقدم من غير وحدة
ومن غير شغل كبير
ننسى حكاية عاوز بس
ومن غير شغل ارتاح
وسيبها لربك فى التدبير
.........................
قامت الثورة عشان نتغير
ولا عشان شعارات
وبدل الحكم نغير اسم باسم
كأن الحاكم مات
دم الشهدا كان حرية ونور
الحرية بتبنى وتعلى معاها رايات
وأحلى ما فى الحرية
أعرف معنى الصفح
وأنبذ فى الخلافات
وآخد حقى بحق
وأرد لبلدى الحق
من غير ماخسر حد
وأزود فى المسافات
بينى وبين إللى وقف جنبى
ساندنى فى وقت الشدة
وساندته فى الأزمات
......................
وأعرف إن السن له حكمه ووضعه
وأخدها زى ما هيه
شرع الله وسماحته حتى فى حالة القتل
قبول الدية
وشرع الله فى العفو ويا القدرة
أحلى هدية
وشرع الله فى الظلم
نرد ه بحق ومانجرحش فى بعض
وأقول حرية
وشرع الله فى اللفظ نصونه
ونعرف إن حروفنا عليها رقابة إلهية
وف أفعالنا ورد الفعل
وقت الحب..
كله جميل.. كله تمام
كله حروف وردية
ووقت الكره
سب وقذف
وكل الناس حرامية
راحت فين أفضل أمة فى البشرية
فين الوسط السمح ف دينا؟
وفين الرحمة ويا العدل
ف كتب السيرة و القوة العمرية
فين قدوتنا حبيبنا رسول الله
المصطفى خير البرية
............................
علشان كده باقولها وأعيدها
كلمة لوجه الله و بجد
اقروا حديث لرسول الله
واعرفوا إن كلامه لحكمة
وإن كلامه الفرض
من وصل السبعين فى الدين
اسمه أسير الله فى الأرض
يبقى نفرق بين مصلحة الوطن الكبرى
وبين مصلحة الفرد
ونشوف إيه يصلح حال الشعب
نعيش قلبنا على بعض
كلمة باقولها لوجه الله
مافى مصلحة غير بلدى وبس
ومالى معرفة مع حد
وإللى كلامى عجبه يقول
والزعلان على راسى من فوق
أنا مستنى الرد
بلدى حبيتى وغالية عليا
ومهما يكون على قلبى زى الشهد
يارب احفظها وتعلى وتعلى
وبحق رسول الله
اكتب ليها الخلد
اكتب ليها الخلد
اكتب ليها الخلد
الكويت الجمعه 13 مايو 2011