تجربة لاعب سابق بالأهلى فى فقدان 55 كيلو من وزنه: استلهمت روح الفانلة الحمراء

شارك القارئ، إسلام جمال، بتجربته فى خسارة 45 كيلو جرام من وزنه، خلال أقل من عام تقريباً، مؤكداً أنه بعد أن وصل حجمة ل 150 كيلو، وأصيب بمرض السمنة، وفقد كل المحاولات فى فقدان الوزن، قرر استخدام برنامج رياضى وعلمى، بعيداً عن إجراء التدخلات الجراحية، وأنه استعان ب"روح الفانلة الحمراء" للعودة إلى وزن مثالى.
وقال القارئ، فى رسالته لخدمة "صحافة المواطن" باليوم السابع، إنه كان ضمن فريق الناشئين بالنادى الأهلى، حتى عام 2004، وتدرب بصحبة النجم عماد متعب مع الكابتن حسام البدرى، إلا أنه ترك مجال كرة القدم بعد عدم تصعيده مع الفريق الأول بالنادى.
وأوضح جمال، أنه بعد ترك لعب الكرة، هاجر إلى الولايات المتحدة الأمريكية، وكان محافظاً على قوامه الرياضى، ولياقته البدنية، إلا أنه بسبب العمل الشاق، وضغوط الحياة، بعد الزواج، أهمل فى نفسه، ونظام أكله وغذائه، ما أصابه بسمنة مفرطة، تحولت إلى مرض يطلق عليه stress eating disorder، ما أدى إلى زيادة وزنه إلى 150 كيلو جراما.

وتابع قائلاً: "كنت تعيسا جداً لأنى مكنتش أتخيل إنى أوصل للحجم دة وفعلاً عانيت جداً عشان ألاقى لبس يليق بالحجم ده وحاولت كذا مرة اشترك فى الچيم وأقلل الأكل بس فشلت وكنت هامشى فى إجراءات ال Gastric bypass أو تدبيس المعدة بس عرفت أن ليها مضاعفات خطيرة على المدى البعيد، بالإضافة إنك لازم تتعلم تأكل إية ومتاكلش اية لأنها ثقافة لازم تعيش بيها".
وواصل قائلاً: "فى يوم بكيت جامد لأنه حسيت إنى مسجون جوا الجسم دة ولازم أخرج فوثقت فى نفسى واستدعيت إرادة اللاعب السابق فى الأهلى "روح الفانلة الحمرا" اللى اتربيت عليها فى النادى وقررت إنى أتبع نظام غذائى سهل جداً وضعته لى زوجتى الأمريكية ليا بحكم علمها ب "الهرم الغذائى" وثبت وجباتى على 1500 سعر حرارى يومياً فقط يتم قياسهم عن طريق أبلكيشن على التليفون اسمو MyFitnessPal وبدأت أمشي يوميا لمدة ساعة ونصف خمس أيام فى الأسبوع والنتيجة كانت مبشرة لأنى خسيت 5 كيلو فى أول أسبوع وخلال سنة خسيت 55 كيلو، طبعاً كان لازم اذكر أن كنت بشرب 5 لترات مياه يومياً مع النظام السابق على فترات متباعدة وقبل الوجبات عشان يدينى إحساس بالشبع وعمرى و كنت بأكل خضروات كتير وعمرى مخدت أى حبوب تخسيس أو كلام فاضى من دة لأنها كيماويات وبتأثر على الكبد، بالإضافة إنى متعودتش على كدة بحكم تكوينى كرياضى".
وتابع: "المهم أنا خسيت 55 كيلو حتى النهاردة وبدأت مرحلة تانية من lifting heavy weights عشان ابنى عضلات تحسن شكلى وتخلينى فخور بالنتيجة اللى وصلت لها والحمدللّه أنا راضى كل الرضا عن الرحلة الشاقة دى بس أثبتتلى إن مفيش مستحيل ومفيش أعذار، وعلى الرغم من إنى بشتغل 14 ساعة يومياً ومع ذلك لا يمكن أعدى يوم من غير ماروح الجيم لأنه حياتى".
واختتم قائلاً: "اللى خلانى اكتب تجربتى من خلال اليوم السابع إنى منزلتش مصر من 2006 ل 2016 ولا مرة ولما نزلت أول مرة بعد أكتر من 11 سنة فوجئت جداً بكمية الناس اللى وزنها زيادة عن زمان ولأنى كنت مكانهم فأنا أكتر واحد أحس بيهم، فنفسى حد يستفيد من تجربتى يمكن، وعندى استعداد أساعد أى حد محتاج مساعدة لأنى بقيت certified pesonal trainer والفيتنس بقت أسلوب حياة زىى الشغل والأكل والشرب".
إسلام تانى واحد من اليمين النادى الأهلى مدينة نصر

إسلام قبل وبعد التخسيس

إسلام قبل وبعد الريجيم

اسلام مع النادى الأهلى فى الأقصر كابتن أحمد ناجى أقصى الشمال وعماد متعب يرتدى تيشرت أبيض

إسلام مع زملائه وفى أقصى الصورة من اليسار عماد متعب