بالفيديو.. فتاة مصابة بمتلازمة داون تكشف سر خسارة وزنها في شهرين

أثارت فتاة مصابة بمتلازمة داون ضجة عبر موقع التواصل الاجتماعى "فيس بوك"، بعد أن استطاعت فقدان 20 كيلوجرامًا من وزنها في شهرين فقط.
كتبت سما رامي على صفحتها عبر فيس بوك: "أنا بملي لبابا وهو بيكتبلي، أيوه دي أنا، كنت تخينة وكان وزني أكتر ب20 كيلو، مكنتش راضية عن نفسي خالص وكنت دايما أتمنى اأتخلص من الوزن الزيادة، وقررت بيوم إني أعمل دايت وأخس وبقيت أشرب قبل ما أنام كل يوم ميه مع عصير ليمون عشان ماما قالتلي إن ده بيحرق السعرات الحرارية وعالغدا آكل سلاطة كتير مع وجبة قليلة، وأعمل سبورت كتير وأمشى فالتراك فالنادي ساعتين كل يوم."
وأضافت سما: "خلال شهرين خسيت 20 كيلو، والكل فرح أوي وقالولي إنتي عندك إرادة قوية، الحمدلله أنا راضية عن نفسي دلوقتي وبشوف نفسي جميلة جدا وبالنسبة للناس اللي مش كويسين إلى مبينادونيش باسمي، أحب أقولكو إني لما كنت تخينة مكنتش عجباكو ولما خسيت كمان مش عجباكو! ده بيقول إنه البشع هو عيونكوا والنظرة بتاعتكوا مش أنا وبرغم كل حاجة أنا بحبكو لأني معرفش إيه يعني كلمة كره اللي انتوا بتقولوها".
يذكر أن سما تحلم بأن تصبح مطربة في المستقبل، وحققت رسالتها أكثر من 4 آلاف إعجاب وأعيد نشرها 376 مرة.