مينا جميل يكتب: مجنون

أنا المدمن لأحلى عيون
وأنا بعمرى بقيت مديون..
بتمنى أكون طريق مفتوح لأفراحك
وألاقى الدنيا ويايا ومش ضدى
ياللى لما الكون بحاله بيعاندنى
بتبقى معايا وتصدى
والكسرة كمان مش سايبانا
رغم اللى بيحصل ويانا
من دنيا غريبة معاندانا
بنحاول نسرق م الأيام
بنحاول نرسم أفراحنا.. ونعيشها قوام
بنحاول نخطف م اللحظات أحلى ما فيها
حتى الأحزان وعنيكى معايا نحليها
تفتكرى اللى بيحصل فينا
كان ممكن فعلاً يتغير
أنا عقلى بياخد وبيدى
فعلا فعلا أنا متحير
علشان اللى بيحصل فينا..
ولا كان بإيديكى ولا بيدى
ووقت البعد جوه القلب بتعدى
بشم ريحتك ف القصايد
بحضنك بين السطور
برسم الفرحة ف عنيكى
لو ما بيننا ألف سور
لحظاتك جنبى ملازمانى
أنا بيكى بقيت إنسان تانى
كل الأماكن منحوتة فيها ضحكتك
ف الشوارع.. مشيتك
ياللى حضنك أحلى جنة
هتوب وادخلها وياكى
وأعيش ف عنيكى واتهنى
أنا المجنون
يا واحدة وفيها كل الكون
تفتكرى العمر هينفع يتعاش كام مرة
تفتكرى القلب لو اتكلم هيدوم فينا
ولا هيهاجر أى مجرة
تفتكرى الكسرة من الفرقة
راح تعمل إيه لو بانت فعلا من برة
تفتكرى القسوة من الأيام
لما بتاخد أحلى ما فينا
وتضيع مع حد ماهوش لينا
ماهياش سرقة
مشاعرنا اللى بتكبر فينا
والشوق والبعد وتنهيدة
والقلب يلملم ف جراحه
وبينزف دمه ويكوينا
ونموت حرقة
مجنون.. وبدونك كاره كل الكون
تفاصيلك سارقانى تمللى
متسقى بحبك بالملى
صوتك
عنيكى
لمسة إيديكى
فرحك وجرحك
ولون الورد ف خدودك
وألوانك ..طفولتك جنبها جنانك
أنا كل ده قولته فأنفاسك
وختمت القصة بإدمانك
طب فاكرة حياة أنا فعلا فعلا حبيتك
حسيت لحظتها أن أنا بيتك
بشوف الدنيا ف عنيكى
حياة واتلخصت فيكى
وف ذكريات
أنساكى إزاي..
أنا أصلا فاكر تفاصيلك مع طعم الشاى
والحوت بيقولك هيلبى
حبيتك علشان تتحبى
وف حضنى بقيتى بتتخبى
أنا المجنون
وأنا بعمرى بقيت مديون
يا روح قلبى