ما كنش العيب فيكِ...

ما كنش العيب فيكِ يا بلدى
العيب كان فى جيل جبان
ساب حقنا فى إيد حسنى
وحسنى سلمها لجمال
لكن وحيات جوك ونيلك
ودم شهيد ميدان تحريرك
ودمعة أم شهيد ثورتك
ليهزم شعبك كل الغيلان
عز ونظيف وجمال
وسرور والعادلى الجبان
وكل اللى كان بيقول
يا ريس.. كله تمام
أوعدك من بكرة يا بلدى
كله يكون تمام
لا رشوة ولا محسوبية
ولا فاسد له بينا مكان
لا فساد ولا تزوير
ولا ريس غير مدتين
وشعب ميدان التحرير
مستنى غلطة مش غلطتين
لا فاسد يطلع له نهار
كان ريس أو كان نجار
كله الوقتى رقيب على كله
ولا عاد فينا حد جبان
حضارتنا لازم تبقى حقيقة
تاريخنا يفضل لينا نهار
حياتنا لازم تبقى بريئة
من أى شلة ناس أشرار
وان كان علينا إحنا الثوار
لا عايزين منصب ولا جاه
كل طلبنا نعيش أحرار
ويبقى رئيسنا ضميره معاه
علشان نفضل نعلى ونكبر
وفوق أكتفنا ما فيش شىء يعلى
وإحنا أظن كلنا نقدر
نخلى بلدنا بيت يجمعنا
ولا نتغرب ولا ننزل
فى بلاد كانت منا أقل
علشان لقمة عيش منظورة
وهى غُامسها شطه وخل
علشان شلة ناس حرامية
زرعوا الأرض بكل الميا
باعوا حصادك كله يا غالية
ولا حصلنا رغيف ولا ميا
إحنا صحينا كتبنا العهد
متوقع بدماء شهدائنا
نزرع أرضك تطرح شهد
ونحاسب كل اللى سرقنا
ولا تلهينا كرة ولا سيما
ولا أفيون ولا قرش حشيش
إحنا ما زلنا دمغنا سليمة
الشهداء صبحوا النغاشيش
مر علينا تلاتين عام
كفاية حشيش كفاية أفلام
علشان خطرك برضو يا بلدى
نبطل نلعب كرة كمان
نلغى فى بتنا شاشات الدنيا
ونخلى شاشات الأخبار
نرصد منها أحوال الدنيا
نراقب فيها أحوال الدار