نداء

يا شباب ثورة يناير يا شباب العنفوان
ياللى جبتوا لنا البشاير وانتوا فى وسط الميدان
لما ناديتوا بحقوقنا والهدير ملو الودان
لما كان الصدر عارى والرصاص مالى المكان
لما صحيتوا اللى نايم واللى محروم والجعان
لما شتتوا اللى هاجم بالجمل ويا الحصان
دقوا أجراس الكنايس واسمعوا صوت الأدان
إحموا ثورتنا بقلوبكم قبل ما يفوت الأوان
واحضنوا مصر بعينيكم واطردوا منها الشيطان
الأفاعى برأسها طلت من جحورها والديدان
والكلاب سنت سنانها عاوزة تنهش ف الكيان
والديابة عينيها حمرا والشرر جواها بان
واللى بيفرق ما بينكم واللى عمره ماستكان
واللى عاوز كل مصرى دمه يجرى ف الميدان
واللى عاوز تبقى فتنه والبلد مفهوش أمان
نفسى نبقى يد واحدة وقلب واحد عاللى خان
نفسى نرفض كل ظالم حتى لوكان ف الميدان
نفسى كل الشرطة ترجع لجل ما نحس بأمان
واللى متورط نحاسبه والنضيف يرجع يبان
هما ليهم حق فينا واحنا لينا حقوق كمان
نحترم بعض ف سلوكنا والتعامل بامتنان
والقانون يحكم ما بيننا والنفوذ مالهوش مكان
والشعار الشرطة تخدم شعب شاف ذل وهوان
لجل ما نعدى المخاطر لجل ما نصيد الغيلان
ياللا بينا نقوم نعمر بالإيدين ويا السنان
خلى كل الدنيا تسمع اسم مصر بتاع زمان