شكرا متعب.. جمهور ولاعبو الأهلى يردون الجميل لملك ال90.. رمضان صبحى: هداف الدورى إن شاء الله.. السولية: هتوحشنا يا قناص.. سعد سمير: أجدع وأنقى الناس.. وعشاق المارد: هتفضل فى قلوبنا وإحنا وراك ومعاك فى أى مكان

وجه جماهير ولاعبى نادى الأهلى القدامى والحاليين، رسالة تهنئة ووداع لابن القلعة الحمراء عماد متعب، معبرين عن حزنهم لرحيل ابن من أبناء المارد الأحمر المخلصين، لنادى التعاون السعودى على سبيل الإعارة.
وعبر هاشتاج "شكرا متعب" الذى احتل الصدارة بموقع التدوينات القصيرة "تويتر"، أنهالت التعليقات المحفزة له والمعبرة عن دعمه فى أى مكان يختاره، وكان من أول المشاركين نجم الأهلى السابق ونادى ستوك سيتى الإنجليزى الحالى رمضان صبحى، حيث كتب له :"ألف مبروك يا ملك ال90.. هداف الدوري إن شاء الله".
رمضان صبحى

كما شارك لاعبو الأهلى فى وداع متعب، حيث كتب عمرو السولية: "هتوحشنا يا قناص يا أبو قلب طيب هنفتقدك الفترة إللى جاية ربنا يكرمك فى إللى جاى وتحقق كل اللى نفسك فيه"، كما كتب أحمد عادل حارس الأهلى: "هتوحشنا يا قناص يا أبو أطيب قلب ربنا يكرمك إن شاء الله".
أحمد عادل

عمرو السولية

فيما كتب مدافع الأهلى سعد سمير: "شكرًا علي كل اللحظات الحلوة اللى فرحتنا فيها كمشجعين للنادى..طول عمرك أجدع وأنضف وأنقى الناس اللى شوفناها هتوحشنا يا قناص..ومكانتك كبيرة قوى فى قلوبنا كلنا".
سعد سمير

وكتب محمد هانى: "والله أنا ليا الشرف إنى أتمرن ولعبت مع واحد زى كابتن عماد متعب .. مش مجرد لاعب بس .. ده قائد ومن أحسن الشخصيات اللى تعاملت معاهم فى حياتى والله .. هنفتقدك كتير جدا .. بس احنا كلنا بنحبك وبنحب نشوفك مبسوط .. ربنا معاك يا قناص".
محمد هانى

أما عن عشاق مارد منطقة الجزاء، فحرصوا على وداعه بالكثير من الرسائل وذكر المواقف المؤثرة له، فقال أحمد :"آخر بطولة قارية حققها الاهلي 2014 وكانت بفضل الجان عماد متعب..هتفضل فى قلوبنا يا عمده وهتفضل أحسن مهاجم لعب فى النادى"، فيما قال الأهلاوى :"شكرا علي كل السعادة اللي منحتها لجماهير الاهلي".
عشاق متعب يودعوه

التعليقات على الهاشتاج

وكتبت غدير:"دايما كنت متعة الماتش لما تنزل الملعب ماكنش مهم نكسب ولا نخسر بس المهم نشوفك بتلعب مع السلامة يا من علمتنا حب الاهلي"، وقال ياسر :"أنت إضافة لأى حتة و أى نادى وأى فريق يا عماد يا متعب"، وقال محمد: "ربنا يكرمك يا قناص كل الأهداف حاجة ولما انت بتسجل حاجة تانية الواحد بيفتكر كل الفرحة من اول بدايتك لحد دلوقت".
التغريدات على الهاشتاج

فيما كتبت هنا حازم: "فاكرين مثلث الرعب فاكرين أما كان أصغر هداف للدورى المصرى وأجوانه اللي بعد ال90، وأما جوزيه قال إن عماد متعب لو برجل واحدة يلعب..آخر مواليد منطقة الجزاء وكفاية إن مفيش حد دلوقتي عارف يكون ربعه كفاية كل اللحظات اللي فرحتنا فيها.. إحنا وراك ومعاك ف أي مكان".
وبالمثل ذكرت ريم فرج أحد مواقف متعب المؤثرة، حيث كتبت :"جمهور الاهلي عمره ماهينسي انك رفضت تحترف بعد مامضيت العقود والأهلى طلب منك تلعب آخر ماتش ضد الزمالك وبعدين تسافر وناديك الجديد رفض روحت لاغيت العقد وكملت فى الأهلى، جمهور الاهلى مبينساش الرجالة والمخلصين ربنا معاك فى أى مكان تاني بس لازم تعرف ان مكانك هيفضل ف قلب كل أهلاوى".
وداع الجماهير لمتعب
ملك ال 90
تغريدة أخرى