أبو حصيرة

عشان أبو حصيرة وأم حصيرة وخالة حصيرة وعمة حصيرة
هانفضل نهاتى كتير كل عام نقول الصهاينة هايخدوا البحيرة
عشان لسة ليهم هناك عضمتين أكلهم تراب القبور من سنين
لكن اللى ناوى يعكنن عليك يشوف نملة عندك جاموسة كبيرة
......
وكل الحكاية طمع إسرائيل فى بترول وغاز ومية ونيل
وشايفة الحكومة بتقفل عنيها فلازم تركّب لنا ألف ديل
وتزرع جاسوسها بحكم الصداقة ولازم نطنش بحكم الحماقة
وييجوا الصهاينة يزوروا البحيرة عشان أبو حصيرة اللى مالهوش مثيل
......
مدام إسرائيل تبقى دولة صديقة فلازم نغمض لها حبتين
تقّتّل ولادنا هناك ع الحدود واحنا نقيم الفرح أسبوعين
نعمر عشانهم موالد حصيرة عشان احنا طبعا خبيتنا كبيرة
مخاصمين إيران من زمان زى سوريا عشان دى أوامر أخوك بنيامين
......
عشان أبو حصيرة هانلبس خازوق لحد ما شعب الكنانة يفوق
ويعرف بأن إسرائيل لسة ناوية تمص اللى فاضل لنا فى العروق
وماشية فى أرض الكنانة تنخور على أى عضمة هاتيجى تدوّر
وبكرة يقولوا إن سيناء بتاعتهم وعايزين يطالبوا بباقى الحقوق
......
يا ناس ليه وطنا يكون مُستباح وإمتى هايطلع علينا الصباح
وإمتى هايصحى ضمير الحكومة ويرفع فى وش الصهاينة السلاح
وإمتى يا صاحبى هاتسمع كلامى وإمتى تبطل تخبى الحرامى
وإمتى هاتدينى حقى اللى عندك وإزاى ترجع زمانى اللى راح
......