يا قراء اليوم السابع

عَندكو مانع ؟
تِدُّو نصيحة لواحد ضايع زَييِّ و تابع
باقرا جرايد .. أخُش مواقع غيم و زوابع
غير فضائيات سِرَّها باتع و ياريت نافع
ببساطة أنا رجل الشارع
يا قراء اليوم السابع
إنتخاباتنا على الأبواب يالَّلا شباب
إشى عُمال و فئات و هباب و دى أحزاب
و ده كان شايف نفسه و تاب و ده كدَّاب
بعد ما ينجح فَص و داب فى النواب
تحت القُبة كأنه متابع
وبيتحصَّن و مالوش رادع
إيه يا بلدنا لإمتى سكوتى جوُّه تابوتى ؟
مش راح يِفْرِق موت على موتى و مش حاتموتى
حادلى بآخر نبرة ف صوتى بدال ما تفوتى
تستجدى من العالم قوتى بِرَهْن بيوتى
و نكون دولة ف عالم رابع
عِزبة ف كون الله الواسع
لَمَّا آمنت بقيمة دورى قلت ضرورى
أنزل اشارك وارضى غرورى مش امسح زورى
بوجبة و مبلغ نقدى و فورى ورغم شعورى
إن غيابى زى حضورى ووِدا شيئ صورى
باردو مانيش حايأس و أقاطع
واندم و ابكى اللبن القاطع
و بديت أقرا وأراقب وأسمع وأطرح وأجمع
مين الأفضل . . مين الأنفع مين الأجدع
والقىَ فضايح و كلام يوجَع زى المدفع
حكايات بتخلينى أرجَّع و حاجات أفظع
ناس تتنازع و لسان لاذع
يِخْجَل منه الدير والجامع
الأحزاب نِفسى أصدَّقهُم حد طايقهم ؟
إللى ما حد عِرِف رؤسائهم إيه مبادئهم ؟
وَفْد وغَد و وطنى خانِقهم ليه يزَهَّقهم ؟
و الاخوان فالحين نلاحقهم فين مخابئهم ؟
و الفاسدين زيِّ اللى سَبَقهم بَالعِين ريقهم
مين حايغير أمرى الواقع ؟
فيه برنامج يقرا الطالع بَشَّرنا بمستقبل لامع ؟
يا كُتَّاب الجيل الطالع إدُّو إجابة لواحد ضايع